徐忠信

徐忠信（英文：Alan Chui Jong Shinn，1952年 8月16號—2022年 11月2號）係香港武打同動作特技演員，前無綫電視動作特效藝員，2022年轉為男藝員。

簡歷

徐忠信1960年代入行，做武術指導同演出嘅電影超過一百部，喺圈中有「大師兄」之稱，初期做小生，例如俠客居多，後期多數演三合會阿頭或者大賊之類嘅奸角。1970年代開始喺無綫電視做武術指導工作，1984年因爲結婚冇耐，想有穩定收入，就正式簽約無綫電視。佢亦間中有份參與幕前演出。

1989年，徐忠信喺無綫電視劇《決戰皇城》幫鄭少秋做替身，要佢由茶樓嘅窗跳出去，喺半空再做出轉圈效果。做第二次時出咗意外，佢被直送浸會醫院，原來十字韌帶剩低一條冚澎唥斷晒，做咗手術，連埋其後嘅物理治療，醫咗大半年時間，從此再做唔到高難度動作，唯有專注做武術指導，平時就算行快啲，跳高跳低都成問題。

徐忠信老婆係臺灣人，佢哋有一仔一女一孫仔一孫女。