三合會

三合會，係講一類華人地下組織，清朝以後就有，主要活躍喺香港、澳門、台灣同埋中國大陸。亦都遍佈世界各地華人社區，例如大馬、星加坡，美加等各地嘅唐人街。

三合會從何而來？

會內傳說：西魯敘事

三合會入邊，流傳關於佢地起源嘅傳說，叫做《西魯傳》或者《西魯敘事》。大約係話，康熙年間，西魯國犯邊。福建少林嘅和尚，幫康熙去平定西魯。成功後比奸臣陷害，反而引來官府火燒少林。少林和尚只有五個死裹逃生，是為少林五祖。五祖一路被追殺，遇到後五祖，又响白鶴洞遇到陳近南，之後執到個香爐，刻有「反㳉復汨」四個字；突然出現一個手長過膝嘅少年，原來係崇禎個孫。陳近南合指一算，就响七月廿五，紅花亭結義，陳近南做軍師，以洪為姓，大家做異姓兄弟，招兵買馬，反清復明。點知一開打就輸比清兵，唯有走。去到一間寺，遇上好打得嘅主持萬雲龍，認咗佢做大佬。誰不知，過幾日萬雲龍就馬失前蹄死埋。陳近南話：原來計錯咗，清朝氣數未盡。大家都係散水，我都要返鄉下。呢首詩大家記住，日後用來相認：「五人分開一首詩 身上洪英無人知 自此傳得兄弟眾 後來相識團圓時」。

以故仔來講，《西魯傳》有好多犯駁唔通嘅地方，幾個場口都似係搬水滸同三國，應該係集體創作嘅。正常人都只當佢係神話傳說。

天地會起源

中國自元朝以後，民間一路都有好多秘密傳播嘅地下組織。一類係利用宗教、拜神拜佛，稱為「教」；另一類就係異姓兄弟結拜，稱為「會」。北方流行「教」，好似白蓮教、天理教、八卦教。而南方就流行「會」，好似天地會、小刀會。

三合會，其實係天地會嘅分支或者別稱。天地會到底幾時開始，邊個係始創人，一路都拗緊：有人話康熙嘅時候就有，有人話乾隆年間先有。官方第一次記載天地會，係乾隆皇帝個陣，台灣嘅林爽文造反，佢自稱係天地會大佬。之後南方各省，官府不停捉天地會。天地會就不斷改名，其中一個名就係三合會。佢地自稱做洪門弟子。

小說同電視創作嘅天地會，係一班讀書人同義士，情操高尚，忠誠勇毅，合力反清復明，試圖回復漢人江山。實情係，天地會、三合會嘅人，三教九流、販夫走卒居多。入會嘅目的，亦未必有咁多民族大義。以社會、經濟背境黎講，廣東東部，由潮州惠州，去到福建漳州泉州一帶，地勢多山，交通阻隔，所謂「山高皇帝遠」。明朝以後，呢一帶都係民風強悍好鬥。同鄉唔同姓，甚或者係同姓但唔同房，郁啲都拎架生互片。打完之後覆戳，週而復始。冧友官府都唔理。大姓人多恰細姓人少，細姓就聯合一齊，斬雞頭，燒黃紙，滴血為盟做異姓兄弟，同大姓對抗。後來演變成為入會，跟大佬，交咗會費，斬雞頭燒黃紙，滴血起誓，就係兄弟「自己友」。比人恰，或者去恰人嘅時候，都可以拖馬。呢種就係「結會」嘅起源。清朝初時人口唔多，去到乾隆中葉，人口增長快過土地，廣東同福建，好多農民冇田冇地，要離開鄉下，入城謀生；做小商販、苦力、或者係道士、和尚、乞兒之類嘅游民。佢地就更加有需要靠「結會」，埋堆自我保護。入會嘅人，多數都冇話造反，更加唔會想恢復一個唔知亡咗幾耐嘅明朝。更多數係怕比人恰，希望有啲互助而入會。亦有入會嘅，本身就係想持住人多，去收保護費、綁票勒索，或者一齊去打劫。當社會上生活唔到嘅人越來越多，就越多同官府對抗，「反清復明」，「順天行道」 呢一類口號，正好啱結會時用來搶人才。於是有啲識字嘅窮秀才，穿鑿附會，左抄右比，製造傳說。天地會，就係呢種環境之下，自乾隆年間嘅福建漳州一帶，向外傳開。去到嘉慶、道光年間，各種名目嘅「會」好似雨後春荀，傳到成個廣東廣西都係。成為無人不知，無處不在，官府越禁越烈嘅「會匪」。

點解叫三合會？

乾隆皇帝五十一年，天地會林爽文响台灣造反。一年後被福康安平定咗。自此以後，「天地會」成為嚴打對像。天地會不論首從，一律可以斬立決。於是各地嘅天地會，紛紛改名；三合會呢個名，就係嘉慶年間開始出現。其他類似源自天地會嘅名，仲有三點會、靝𪒉會等等。天地會內部，通常都自稱「洪門」。去到道光年間，廣東、廣西一帶嘅天地會，多數都係叫三合會。

至於何謂三合？有人話係「天地人」三合：「人於天地中」，暗示係天地會。亦有人話係「三河合水」。天地會嘅一首門詩：「地震高崗 一派溪山清水秀 門朝大海 三河合水萬年流」。天地會發源地，雲霄高溪鎮，前面真係有三條河合水。另一種講法，「三合會」來自「三點會」。「三點」係來自「洪門」個「洪」字。仲有講法，話三合係「儒釋道」三結合。

三合會背語

三合會係秘密組織，有一套特別詞語，只係會員聽得明，以免外人識破。呢啲就叫做背語。後來聽得多，好多街坊都識，用埋一份；有啲仲上咗電視，拍埋電影，通哂天，變成全部人都講。例如：

披 即係 衫

底橫 即係 底褲

超 即係 眼、眼鏡

蛋 即係 手錶

老毛 即係 利是

輪 即係 電話

鏹 即係 煙仔

耕砂 即係 食飯

羊牯、老襯 即係 非會中人

老表 即係 同門中人

車頭 即係 探員

條女 即係 女朋友

條菜 即係 發生咗性關係嘅女朋友

柳記 即係 獄警

𣁽 即係 外國人

桂枝仔 即係 香港人

二五仔 即係 叛徒

斜牌 即係 妓女

爆江 即係 流血

受靶 即係 坐牢

開片 即係 打架

架生 即係 武器

笠 即係 打劫

冧友 即係 殺人

報串 即係 報案

着草 即係 走路

蒲頭 即係 現身

入冊 即係 入獄

臭格 即係 拘留所

堅 即係 真

流 即係 假

賴野 即係 失手

淆底 即係 恐懼

架步 即係 落腳點

比較少人用嘅背語：

洗濕個頭 即係 入咗會成為會員

死過未？ 即係 入咗會未？

大底、三及第 即係 職員 (棍、扇、鞋)

過底 即係 轉會

過面 即係 轉同會另一大佬

衫仔 即係 會簿

五件頭 即係 風、流、寶、印、招詩

朱、雷、昂、癬、揸、龍、吉、鮑、彎、披 即係 一、二、三、四、五、六、七、八、九、十

中國大陸曾經有試過肅清黑社會。50年代初嘅鎮反，殺咗幾十萬人，拉咗幾百萬人。大陸嘅三合會唔係打靶就係捉咗去勞改。所以喺改革開放之前，黑社會曾經一度喺中國絕跡；後來開放之後，黑社會就慢慢喺大陸重現。不過呢類「黑社會」，已經唔係二百年前留傳落黎嘅三合會。

現時香港有大約57個活躍嘅三合會組織，當中有好多嘅規模其實唔係好大；比較大嘅計有新義安、和勝和同十四K……等等，佢哋多數都係從事犯罪嘅社團組織。三合會嘅規模，等同於西方嘅黑手黨。主要從事販毒、洗黑錢、走私、非法賭博、賣淫、偷車、收保護費……等等。今時今日唔少收入係靠翻版貨，好似軟件光碟，鐳射唱片同埋電影光碟。佢哋亦都會將唔見得光嘅錢用來投資喺正當行業上面，令到啲錢可以變成光明正大嘅流動資金，以避開廉政公署或者警方商業罪案調查科嘅追查，個過程喺黑道術語入面叫做「漂白」。