新義安
新義安，俗稱「老新」，係香港三合會組織，由向前喺1919年成立。1980年代，社團會員人數達到20萬；1990年代開始，唔少成員去咗中國大陸發展。而家仲係香港其中一個最大嘅黑幫[1]，成員估計大約有25,000人[2]。除咗香港之外，新義安亦都活躍喺英國、新西蘭、東南亞等[3]，同埋中國廣東省。
背景
[編輯]「義安」係潮汕嘅古稱，潮州府古代有段時間叫做義安郡，聽講早喺1866年（清朝同治五年）廣東嘅潮州人成立「萬安社」，原本係互助性質嘅同鄉會組織。1919年，社團內部分裂，部分成員自組「義安社」；到咗1921年，義安成員以「義安工商總會」嘅名義向香港華民政務司署註冊，之後向前逐漸成為領袖。
發展
[編輯]1947年因為呢個會涉及三合會活動而被取消咗社團註冊，擁有中國國民黨軍銜嘅龍頭大佬向前，將組織改名做新安公司同分支「永安公司」，俗稱叫「新義安」。
1953年，新義安龍頭向前畀港英政府遞解出境到台灣。由佢個仔向華炎執掌新義安。
1956年警方大舉掃蕩幫會，新義安出現咗敬義、義群、大好彩等分支，之後經新向氏龍頭大手改革，確立幫會領袖世襲制，由向氏代代相傳。發展到1980年代，組織結構相當完善，設有「五虎」、「十傑」，又喺各主要地區設有坐館。
1980年4月1號，香港《華僑日報》披露：1980年3月29號開始，警方大舉掃蕩新義安，有50幾個坐館、紅棍、白紙扇等成員被捕，成為1956年以嚟最大嘅一次「反黑」行動，又繳獲一批現代化武器同黑幫文件。[4]1994年1月8號，香港警方再次發動龐大嘅「掃黑」行動，拘捕新義安14個高層，警方一度估計新義安已發展到8至10萬會員，同和勝和仲有十四K號稱全港三大黑幫組織。
業務
[編輯]新義安組織鮮明，以向氏家族馬首是瞻，奉向氏為「龍頭」[5]，社團以潮汕人為核心，深圳力量以陳氏為核心，已經企業化。喺香港設有「五虎」、「十傑」，又喺各地區設一個話事坐館。當中以袁貴安（尖東白虎）最舉足輕重。新義安喺香港嘅活動區域囊括香港島、九龍、新界同離島，犯罪手法有勒索、收保護費、販賣毒品、高利貸、開設色情場所、非法賭場、走私等。同時又經營企業，例如電影製作公司、金融投資公司同酒樓等。所有成員都有編碼。向前家族主導香港嘅電影業，出身江湖家族嘅向氏可謂喺娛樂圈、電影界舉足輕重，向前家族成員亦有唔少喺商界立足。
事件
[編輯]成員裸體拍片招供
[編輯]2021年7月25號，自稱係九龍城新義安馬仔，綽號「阿鬼」嘅王鍵泓，同另一個同黨合謀打劫長沙灣一個地下賭檔，結果畀對方識穿，「阿鬼」被逼剝光豬攞住自己嘅身份證拍片招供。段片之後畀人擺咗上網廣泛流傳，引起社會哄動，亦都引起警方嘅注意[6]。之後警方主動調查，又搵到當事人「阿鬼」，不過佢冇供認計劃打劫賭檔同被逼裸體拍片嘅事，只係承認去過非法賭檔賭錢，畀警方以非法賭博罪名拘捕。另外，警方又拉咗屬於另一黑幫組織「水房」嘅非法賭檔負責人「肥發」[7]。
參考
[編輯]- ↑ Davies, Anthony (1995-08-25). "Deadlink". Asia Week. 原著喺2006-01-27歸檔. 喺2006-01-27搵到.
- ↑ "Triads". Illuminated Lantern. 原著喺2012-02-04歸檔. 喺2006-01-27搵到.
- ↑ "Global Crime: International and Regional Co-operation Among Governments and Gangs Alike". Transnational Communities Programme. 原著喺2012-09-02歸檔. 喺2006-01-27搵到.
- ↑ Deadlink 互聯網檔案館嘅歸檔，歸檔日期2006-06-27.
- ↑ 〈黑幫制度拳頭是選票 選舉年廝殺頻頻〉。《《[[香港蘋果日報|蘋果日報]]》》。2011年10月17號。原著喺2012年1月19號歸檔。喺2012-03-26搵到。
- ↑ 凌逸德 (2021-07-26)。〈疑黑吃黑打劫非法賭場被擒 黑幫男被「剝光豬」拍片〉。《香港01》。喺2021-07-27搵到。
- ↑ 曾海帆、翁鈺輝 (2021-07-27)。〈黑幫男被「剝光豬」拍片事件 警方搵到事主 拘捕賭檔負責人〉。《香港01》。喺2021-07-27搵到。