御史衞公祠
| 衞氏宗祠 永思堂 | |
|---|---|
| 主祀 | 伯英（五世祖） 元泰（六世祖） 君盛（七世祖） 宗禮（八世祖） 觀德（九世祖） 文杰（十世祖） 文政（十世祖） 文受（十世祖） 文昱（十世祖） |
| 家族信息 | |
| 家族 | 瀝滘衞氏 |
| 起源 | 河東郡 |
| 修建史 | |
| 始建 | 1588年 |
| 方位 | |
| 地址 | 廣州市海珠區瀝滘村中區一巷18號 |
| 朝向 | 坐東朝西 |
| 現時尚存 經已掛牌 | |
| 登錄名 | 御史衞公祠 |
| 等級 | 海珠區登記保護文物單位 |
| 籌 | 1-2 |
| 登錄時間 | 2011年10月 |
御史衞公祠，堂號永思，亦叫御史祠、隔橋永思祠，喺廣州市海珠區瀝滘村中區坊，係番禺瀝滘衞氏五世祖、御史中丞衞伯英嘅祠堂。明朝萬曆十六年（1588年）起。初頭門額寫衞氏宗祠。坐東朝西。2011年10月，公佈為海珠區登記保護文物單位。
建築
[編輯]總體係蝠鼠型格局。總面闊30.6米，總進深18.9米，佔地578.34平方米。磚木石結構。
中路第一沓面闊三間13.52米，進深3.5米共七架，前牆後柱承重。硬山頂，鑊耳封火山牆，灰塑龍船脊。明間前便有四級石級，有抱鼓石。牆體青磚花崗石腳。分中牆中開大門，兩便有門枕石，兩棟木門。花崗石鋪地。後簷係花崗石柱。第一、二沓之間有天井。中間係花崗橫條石鋪地。兩便係卷棚頂廊，碌筒瓦面。
第二沓內寢十五架，面闊三間，進深11.8米，三三柱加後牆承重，屋頂形式似足第一沓。有三級花崗岩石級。側邊有個細抱鼓。前簷柱係八角鹹水石柱。金柱係木圓柱，有柱頭斗。左路形式係梯形，面闊約莫7.4米，進深約莫18.9米。右路有兩房，中間有小天井，總面闊9.7米，總進深13.4米。
建築前便有一個三面圍住嘅院仔，闊16.8米，進深9.0米。
匾額同神主
[編輯]祠堂初頭門額寫「衞氏宗祠」，落款係「經筵講官黎民表贈」。第二沓內寢上高掛堂號「永思」，落款係「翰林檢討林承芳贈」。祠堂內寢神主四櫃，祭祀六世祖元泰、七世祖君盛、八世祖宗禮、九世祖觀德；左廊三櫃，祭祀十世祖文杰、文政、文受、文昱。
攷
[編輯]- 衞宗正、衞鎔。《衞氏族譜六卷》。
- 廣州市文物普查增編編纂委員會 (2014)。〈心和衞公祠〉. 出自 陳建華 等 (編)。《廣州市文物普查增編 中卷》。廣州出版社。頁 365。ISBN 978-7-5462-1837-3。