誠齋衞公祠

誠齋衞公祠（粵拼：sing4 zaai1 wai6 gung1 ci4），堂號燕寧（jin3 ning4），喺廣州市海珠區瀝滘環秀坊四巷1號，係清朝嘉慶年間嘅建築，坐北向南，三間两進，磚木石結構。呢間祠堂做過瀝滘第五、六、十三、十四經濟合作社同社區活動中心。

建築

頭一沓面闊三間10.10米，進深6米。硬山頂，博古脊，碌灰筒瓦，瓦當剪邊，木雕花封檐板，青磚花崗石腳牆。明間前牆向內凹做門廊，石門額陰刻「誠齋衞公祠」。前邊有抱鼓石。家下頭一沓入邊間隔變咗唔少，連出邊都貼埋黃色瓷磚。

頭一沓同第二沓之間嘅天井4.71米。

第二沓面闊三間10.25米，進深三間9.75米，牆厚0.43米。屋頂形式同頭一沓咁上下。前檐柱係花崗石方柱，截面0.30米×0.30米。金柱係圓木柱，周長1.2米，有柱櫍同石柱礎。