思德書室

思德書室

思德書室喺香港新界北區粉嶺南圍，係新界五大家族粉嶺彭氏三間祖祠之一。思德書室喺道光26年（1846年）起，由彭氏彭步進為咗紀念佢嘅第六代祖先彭思隱所起，並且為村民提供教育。思德書室由1936年開始用做政府資助嘅粉嶺學校校址，而家書室出面仍然保留「粉嶺學校」嘅牌坊。喺1957年搬咗去隔籬新校址，改名做粉嶺公立學校。書室喺2009年12月18號被古物古蹟辦事處評為二級歷史建築。

結構同用途

思德書室係一間兩進式家祠兼學塾，曾經喺道光同光緒年間兩次重修，除咗祭祀祖先外，亦畀族裏面嘅子弟研習進修之用。書院規模唔大，只係得幾個課室，以前只畀姓彭嘅村民入讀，外姓者一律拒絕。上一輩嘅村民都係喺書院讀書，採用中國嘅傳統教材教學，粉嶺公立學校起好之後就搬咗過去，而原來嘅思德書室就改做教師宿舍。後來政府改例，禁止任何人喺學校範圍留宿，思德書室就唔再做學校宿舍。而家書室已經冇咗教育嘅功能，只畀族人做祭祀同舉行宴會之用。

最近一次維修喺2000年進行，工程將兩邊嘅房間屋頂改用混凝土，並將窗門改成鋁窗，破壞咗建築物嘅原本面貌。

參考

• 從彭氏古堡宏觀粉嶺圍之今昔
• 《新界宗族文化之旅》，嚴瑞源編著，萬里書店，ISBN：962-14-2936-6

睇埋

• 彭氏宗祠 (粉嶺圍)

出面網頁

• 思德書室-粉嶺古蹟