惡

惡ok3，又叫邪惡，係倫理學同宗教成日提到嘅概念。惡依個概念非常複雜，其具體定義有相當爭議性。一般嚟講，邪惡嘅個體會做出一啲道德上認為係唔好嘅嘢，尤其係講緊佢哋會不必要噉為他人帶嚟痛苦，例如係謀殺、放火、強姦等，就普遍認為係極惡嘅行為^[1]^[2]^[3]。惡嘅相反係善。

歷史詞源

由粵語嘅角度睇，惡一詞嘅詞源歷史悠久。眾漢語之中都有用到惡噉嘅詞語。依個詞上古漢語同中古漢語都有。

對惡依隻漢字嘅讀法，現代粵語讀音為粵拼：ok3 ，而標準官話讀音則為普拼 è ，粵語保留咗中古漢語讀音嗰個入聲尾。

用咗惡嚟表示邪惡嘅詞語，有惡人、罪惡、十惡不赦、罪大惡極等，依啲詞係粵語講嘢都會用嘅。

喺宗教同神學入面，邪惡嘅概念通常較清晰。

好多宗教，比如係基督教，都會將邪惡當成係一股獨立存在嘅力量或者實體，例如喺基督教中，撒旦或者魔鬼可以係惡嘅化身^[4]，當中《神曲》依首史詩，就將撒旦描述成上帝嘅相反：上帝全知、全能同全善，而撒旦就代表住無知、無能同埋邪惡。

亦有一啲神學觀點覺得，邪惡並唔係咩實體，而係善嘅缺乏，就好似黑暗係缺乏光噉。

喺道德哲學入面，有關邪惡嘅討論通常脫離神，而係集中於人類行為本身。

一般認為有關一樣嘢邪惡與否，意圖同動機好重要：好多哲學家界定邪惡嗰陣，都講到邪惡涉及一種刻意、無理由噉去對他人造成傷害嘅行為。

雖然邪惡依個詞成日用，但係其定義難以統一，帶有一定嘅主觀性。

例如文化差異嘅問題。喺唔同文化同社會入便，對於邊啲行為係邪惡，啲人嘅見解會持續變化。某啲文化覺得係正常嘅行為，喺另一個文化裡便可能會覺得係十惡不赦。^[5]

由哲學嘅角度諗，好似電車難題等嘅思想實驗表示，邪惡有陣時好難定義。

↑ Morton, Adam (2004). On Evil. doi:10.4324/9780203704127. ISBN 978-0-203-70412-7.
↑ Calder, Todd (26 November 2013). "The Concept of Evil".
↑ "Evil - Etymology, Origin & Meaning".
↑ Hans Schwarz, Evil: A Historical and Theological Perspective (Lima, Ohio: Academic Renewal Press, 2001): 42–43.
↑ Milgram, Stanley (2017). Obedience to Authority. Harper Perennial. pp. Foreword. ISBN 9780062803405.