愛國唔愛黨

愛國唔愛黨（中文：愛國不愛黨）係一種喺香港本土派崛起之前，香港泛民主派嘅其中一種政治主張。意思係即使愛國亦唔等同要支持共產黨，亦可以爭取香港嘅民主自由。甚至喺一啲民主派組織嘅黨綱入面都有一啲類似嘅說法。

不過，隨住中港矛盾問題日益嚴重、本土派崛起、香港逃犯條例爭議、以及北京單方面強行修改香港選舉方法等事件之後，呢種論述越來越少人支持，甚至去到2021年，國務院港澳辦主任夏寶龍同埋香港政制及內地事務局長曾國衞都講到明愛國即係唔可以傷害中國共產黨嘅領導。

起源

根據《鄧小平文選》第三卷，人民出版社1993年10月第1版，第61頁鄧小平喺提出一國兩制作為處理香港主權問題嘅時候，提及：「什麼叫愛國者？愛國者的標準是，尊重自己民族，誠心誠意擁護祖國恢復行使對香港的主權，不損害香港的繁榮和穩定。只要具備這些條件，不管他們相信資本主義，還是相信封建主義，甚至相信奴隸主義，都是愛國者。我們不要求他們都贊成中國的社會主義制度，只要求他們愛祖國，愛香港。」（譯：乜先叫愛國者？愛國者嘅標準係，尊重自己民族，真心撐祖國恢復行使香港嘅主權，唔整衰香港嘅繁榮同埋穩定。祇要具備呢啲條件，唔理佢哋信資本主義，定係封建主義，甚至信奴隸主義，都係愛國者。我哋唔會要求佢哋贊成中國嘅社會主義制度，祇係要求佢哋愛祖國，愛香港。）

愛國唔愛黨喺香港嘅展現

愛國唔愛黨喺香港其中一個最為明顯嘅展現，就係多年嚟由支聯會舉辦嘅六四燭光晚會，佢哋主張建設民主中國，亦唔會否認自己作為中國人嘅身份。