愛爾蘭國防軍

出自維基百科,自由嘅百科全書
跳去: 定向搵嘢
愛爾蘭國防軍軍徽


愛爾蘭國防軍愛爾蘭蓋爾文Óglaigh na hÉireann英文Irish Defence Forces)係愛爾蘭共和國嘅武裝力量,由陸軍、海上部隊、空中部隊同後備國防軍四個部份組成。愛爾蘭國防軍嘅總司令係愛爾蘭總統,但係以總統嘅名義行使總司令職權嘅通常係國防部長,而國防部長嘅諮詢機構係國防委員會。

愛爾蘭國防軍個愛爾蘭蓋爾文名,同愛爾蘭共和軍嘅愛爾蘭蓋爾文名完全一樣,反映咗共和軍同國防軍之間上傳下承嘅歷史關係。

角色[編輯]

由於愛爾蘭位置偏遠,因此外國軍隊大規模入侵嘅可能性唔大,加上愛爾蘭共和國從自由邦時期就開始奉行嘅中立政策,令到愛爾蘭國防軍嘅武裝相當無威脅性,空中部隊甚至連一架戰鬥機都無。雖然係咁,但係愛爾蘭共和軍就有參與聯合國維和部隊嘅長遠歷史。今日,國防軍嘅職能包括:

  1. 保護愛爾蘭共和國免受外敵入侵(北愛爾蘭由英軍保護);
  2. 協助警察
  3. 參與聯合國維和、災害救護及人道主義援助行動;
  4. 喺歐盟框架範圍內保護愛爾蘭漁業資源;
  5. 其他民防職能,包括運輸重要人物同處理海洋污染等等。

組織[編輯]

愛爾蘭國防軍分為兩大組成部份:常備國防軍同後備國防軍。常備國防軍分為陸軍、海上部隊同空中部隊;後備國防軍分為第一陣線同第二陣線,第一陣線主要由常備國防軍嘅復員老兵組成,第二陣線就分為陸軍後備隊同海上部隊後備隊。

陸軍[編輯]

陸軍常備部隊有大概8500人,後備部隊就有大概13000人。全部陸軍部隊分屬兩個旅:駐守東部嘅第一旅同駐守南部嘅第二旅。之前重有過一個駐守西部嘅第四旅,但係已經喺2012年解散咗,屬下嘅部隊分別編入第一旅同第二旅。此外,陸軍部隊重會按照作戰角色分為九個兵團:步兵兵團、炮兵兵團、騎兵兵團、工程師兵團、後勤兵團、醫療兵團、運輸兵團、憲兵兵團同通訊及情報兵團。陸軍重喺橡樹教堂郡古勒基地(Campa an Churraigh, Co. Cill Dara)設有一個訓練基地,另外重有陸軍特種部隊等獨立編制。 同英國相比,愛爾蘭嘅軍工業相對落後,步兵嘅武器,從槍械到戰車,絕大部份都要從海外採購。目前陸軍最常見嘅戰車係瑞士MOWAG公司生產嘅「食人魚」裝甲運兵車同英國Alvis公司生產嘅FV101「蝎子」輕型坦克。雖然愛爾蘭基於中立政策而無加入北約,但係陸軍嘅武器好多都係符合北約制式嘅。

海上部隊[編輯]

海上部隊一共有1144人,主要嘅職責係保衛愛爾蘭共和國領海同埋愛爾蘭海魚保育區。雖然海上部隊未參加過任何戰爭,但係就截獲過好多企圖出入愛爾蘭嘅運毒船[1]。海上部隊目前有8隻輕型戰艦,全部配有充氣快艇,另外重有一啲訓練船隻。火力唔算強,但係足夠保衛領海,需要嘅時候亦都可以實施登艦作戰。

由於奉行中立政策,海上部隊嘅角色僅僅限於「保衛國土」,具體包括[2]

  1. 護漁;
  2. 協助政府機構改革;
  3. 截獲毒品;
  4. 海上維安;
  5. 潛水任務;
  6. 控制水體污染;
  7. 海外任務支援。

空中部隊[編輯]

空中部隊係愛爾蘭國防軍最細嘅組成部份,祇有大約939人。同一般嘅空軍唔同嘅係,愛爾蘭空中部隊並無擔當到國土防空伊個角色,亦都唔負責海上搜救行動(海上搜救行動由海岸防衛隊負責)。空中部隊嘅主要角色包括:

  1. 支援陸軍;
  2. 支援海上部隊;
  3. 支援政府機構;
  4. 支援民間力量;
  5. 支援政府部門。

參考[編輯]

  1. [1]