掛綠
掛綠（粵拼：gwaa3 luk6）係荔枝其中一隻常見嘅品種，特色係果皮紅中帶綠，果肉爽甜，畀唔少人話係最靚嘅品種，所以賣得比較貴，古時更做過貢品畀皇帝食。
掛綠原產自廣州增城，當地出產嘅叫增城掛綠（zang1 sing4 gwaa3 luk6）。
名
[編輯]皆因掛綠每粒果都兜住一圈綠線，所以叫掛綠。
掛綠個名亦有個傳說同八仙嘅何仙姑有關。何仙姑係增城人，成仙後依然鍾意到凡間食荔枝，有日佢坐喺西園一樖荔枝樹嘅樹枝上織腰帶，走嗰陣漏低咗一條綠色絲線，繞住咗喺荔枝果上面，就變成「掛綠」。
史
[編輯]掛綠喺南宋時期嘅12世紀之前已經有人種，明代末年到清代初年開始多人種，但係喺中共統治期間嘅大躍進入面，大多數原生掛綠已經被毀，淨返一樖母樹喺增城掛綠廣場，樹齡超過四百年，高5米幾，而家嘅掛綠樹種多數出自佢度，喺增城幾個鄉種。
增城每年都搞掛綠拍賣活動，拍賣價最高去到50萬元人民幣一粒，列咗入健力士世界紀錄大全。