新喀里多尼亞

新喀里多尼亞嘅位置

新喀里多尼亞

新喀里多尼亞係法國嘅海外特殊屬土。佢係一堆島，響太平洋，響澳洲以東1,500公里，紐西蘭以北2,000公里，南回歸線再北多幾個緯度。面積1.86萬平方公里，人口27萬（2019年估計）。

屬土地理上主要分為兩部分：東面嘅主島同西面嘅羅雅堤群島，係沉沒咗嘅西蘭大陸最北嘅陸地。主島最多嘅岩石係源自海洋岩石圈，但係鏟咗上去嘅橄欖岩同玄武岩（合稱蛇綠岩套），帶蒞多種礦產。啲人就從橄欖岩風化層中開採咗全球一成嘅鎳礦，係當地主要經濟支柱。嗰啲特別嘅風化土壤亦都孕育出唔少獨有動植物。而由於處於熱帶，主島同羅雅堤群島都俾珊瑚礁包圍，所以當地都受旅客歡迎。

主島地貌

1853年起受法國殖民統治，1998年獲得自治。所以佢哋嘅貨幣唔同法國本土，係同法屬波利尼西亞一樣使太平洋法郎嘅。由於同歐裔居民不嬲有矛盾，當地原住民中有要求獨立嘅聲音，但經過三次公投後，啲人整體上都決定留喺法蘭西。而法國亦都重視依堆島，唔單止鎳礦係戰略資源，佢更加係法軍喺太平洋嘅大本營。

出面網頁

• 新喀里多尼亞喺中央情報局《世界概況》嘅資料 （英文）
• "New Caledonia - Department of Foreign Affairs and Trade" (英文). 澳洲外交貿易部.