新驛
35°38′46.7″N 116°40′37.6″E / 35.646306°N 116.677111°E
呢篇文講鎮。想搵同名嘅社區嘅話，請睇新驛社區。| 新驛鎮 | |
| 統計資料 | |
| 普通話拼音 | Xinyi |
|---|---|
| 所屬省級政區 | 山東 |
| 所屬地級政區 | 濟寧 |
| 所屬縣級政區 | 兗州 |
| 政區類別 | 鎮 |
| 面積 | 66.6[1] km² |
| 行政村數目 | 57[2] |
| 人口(2019) | 5.3萬人[3] |
| 人口密度 | 795.8人/km² |
| 郵政編碼 | 272100[4] |
| 政區代碼 | 370882102[4] |
| 網站： 新驛鎮政府網站 | |
新驛（粵拼：san1 jik6）係中國山東濟寧兗州西北部嘅鎮，離兗州市區20公里，鎮政府駐新驛一村[5]。面積66.6平方公里[1]，人口5.3萬人（2019年）[3]。交通上呢度有兗梁公路（兗州~梁山）同埋寧濟公路（寧陽~濟寧）穿過[5]。
地理
[編輯]新驛喺兗州西北部，東面係大安，北面係小孟，西面有汶上，南面係顏店。東西最闊12.7公里，南北最長11.9公里，轄區嘅形狀唔規則，總面積66.6 km²，合99900畝[1]。新驛處於黃河沖積平原，海拔30米，屬温帶季風性氣候。當地經濟比較發達，佢又係週邊地方嘅交通要道，無論人口定面積都係個大鎮。當地出產小麥、粟米、蠶蟲、大蔥[4]，有7.1萬畝田地，喺本地譽爲「兗州西部糧倉」[3]。資源上有豐富嘅黃沙、地下水[4]。
史
[編輯]| 中國地名變遷 | |
| 建置 | 1958年 |
| 現名 | 新驛鎮 |
| 中華人民共和國 | 共産主義公社（1958年~1962年） 新驛公社（1962年~1966年） 新驛區（1966年~1968年） 新驛公社（1968年~1984年） 新驛區（1984年~1986年） 新驛鎮（1986年後） |
|---|---|
新驛，係簡稱自新嘉驛（san1 gaa1 jik6），「新」係話佢新設，「嘉」意思「吉祥嘉言」[6]。新嘉驛係明代時（洪武二十九年，1396年）設嘅驛站，係聊城、汶上、兗州、濟南之間嘅交通要衝[7][8]。舊時新嘉驛係個好大嘅驛站，車馬行人來來往往，所以商業繁榮，設施高檔[9]，居民越來越多，最後變成兗州西北部最大嘅村鎮[8]。作爲緊要嘅驛站，新嘉驛幾出名，一啲人喺度留低啲詩，其中最出名係明末清初時，有一個會稽（而家浙江紹興）女子，嫁咗畀個北方武夫做妾仔，萬曆四十七年（1619年）同佢丈夫經過新嘉驛，因爲大婆糟騭佢，佢喺自殺之前喺牆壁度題詩三首，因爲佢嘅詩同遭遇打動咗文人，個個都來和應佢嘅詩，成爲當時幾有名嘅文學事件[8]。又比如《儒林外史》亦提過呢度[10]。而設新嘉驛前，當地地名叫賓陽（ban1 joeng4）[9]。
作爲附近最大嘅鎮，新驛一直係區、鄉嘅政府駐地。1949年時係滋陽縣第五區，下設聯防。1950年聯防改爲9個鄉，1956年撤銷第五區，分成新驛、型堂、蔡莊、郗村四個大鄉。1958年成立共産主義人民公社，範圍包括而家嘅小孟、顏店嘅郗村。當年滋陽同曲阜合併，直到1962年曲阜同兗州分開，先改叫新驛人民公社。1966年5月改叫新驛區，下設9個公社仔；1968年恢復爲公社，下面啲公社仔改爲管區；1982年頭，將西部嘅郭村、蔡莊、店子街三個管區分出，做店子街人民公社。1984年5月，店子街公社北部三條村畀過小孟，其餘重新併入新驛，因爲改革，新驛又恢復爲縣轄區。1986年12月，改成新驛鎮[1]。
文化
[編輯]新驛一帶好耐歷史，除咗驛站帶來嘅繁榮，喺之前，高吳橋呢條大村就係古戰場，可以追溯到周代咁古老。當地又有唐宋金元四代嘅金石碑刻，明代時嘅郡王朱壽鉅亦葬喺呢度[8]。新驛有一處省級文物，兩處市級文物，三處縣級文物，其中省級文物東頓村遺址，係戰國、漢代時頓丘古城嘅遺蹟[1]。
政區
[編輯]- 村：新驛一村、新驛二村、新驛三村、新驛四村、新驛五西村、新驛五東村、秦村、魏樓、駱村、胡營、高吳橋一村、高吳橋二村、高吳橋三村、高吳橋四村、毛辛莊、王樓、皇林、前閆樓、高村、朱張、後閆樓、大莊、何村、東一村、東二村、東三村、西東村、西西村、堰頭、河灣、楊營、徐村、型堂、後寺、文興坡、高莊、郭村、劉村、袁村、馬樓、姜村、蔡莊、葛樓、孫村、李村、官路、肖村、苗堂、王府莊、范窯、張窯、王堂、韓馬、店子、趙呂、董樓、義和莊
攷
[編輯]- ↑ 1.0 1.1 1.2 1.3 1.4 1.5 〈新驛鎮基本情況簡介〉。新驛鎮政府。原著喺2016年3月5號歸檔。喺2015年10月14號搵到。
- ↑ 2.0 2.1 〈2013年統計用區劃代碼和城鄉劃分代碼〉。中華人民共和國國家統計局。喺2015年10月14號搵到。
- ↑ 3.0 3.1 3.2 〈新驛鎮〉。《兗州區政府》。2019年10月8號。喺2020年3月31號搵到。
{{cite web}}: CS1 maint: url-status (link) - ↑ 4.0 4.1 4.2 4.3 〈山東濟寧兗州區新驛鎮〉。博雅地名網。喺2015年10月14號搵到。
- ↑ 5.0 5.1 〈新驛鎮〉。行政區劃網。2014年1月27號。喺2015年10月14號搵到。
- ↑ 〈兗州市〉。文化濟寧。原著喺2016年3月4號歸檔。喺2015年10月15號搵到。
- ↑ 〈驛傳志〉. 《兗州府志》。｢由昌平驛西北四十五里爲嵫陽縣新嘉驛。洪武二十九年添設。有城垣、聚落，驛亭整潔，可以宿止。濟寧、汶上由寧陽入會城，亦由此而東，一橫衝也，過客易馬具食而行。｣
- ↑ 8.0 8.1 8.2 8.3 〈歷史文化〉。新驛鎮政府。原著喺2016年7月16號歸檔。喺2015年10月14號搵到。
- ↑ 9.0 9.1 《滋陽縣志》。｢新嘉驛，舊名賓陽城。高臺、鼓樓、大門、二門、東西角門，大廳五間，東西廂房各三間。後鑿小池，架橋構亭，花竹蔚然，行館最爲華整。｣
- ↑ 吳敬梓。〈第三十四回〉. 《儒林外史》。｢莊紹光從水路過了黃河，雇了一輛車，曉行夜宿，一路來到山東地方。過兗州府四十里，地名叫辛家驛，住了車子吃茶。｣註：「辛家驛」即係「新嘉驛」。