日本生可樂

日本生可樂（粵拼：jat⁶ bun² saang¹ ho² lok⁶）係一款日本嘢飲，後嚟響2023年7月嗰陣喺中國內地廣東一帶演變成一個極之流行嘅粵語網絡梗。事緣係廣東一位抖音嘅直播帶貨女主播夏老實用埋嗮啲天花龍鳳嘅言辭嚟推銷生可樂，結果反而畀好多粵語地區嘅網民串翻轉頭兼惡搞，其中最出名嘅係有位網民留言：「飲咗佢推介呢款生可樂之後，『賓周』都識旋轉同埋發光」。亦因為噉搞到「賓周」呢個粵語詞喺內地互聯網迅速普及，而家內地好多本身唔識粵語嘅人都知道咗「賓周」解乜。

背景

「生可樂」（日文：生コーラ）最早係百事可樂喺日本由三得利推出嘅嘢，所謂「生」，喺日文度係「新鮮」噉解，譬如「生啤」。「生可樂」採用物理滅菌，所以氣泡會多過平時啲可樂，亦可以保存得更耐，口感清爽啲。2023年4月，呢款「生可樂」喺中國內地上市，價錢高過普通可樂啲哚。

經過

廣東抖音博主夏老實係2023年7月嗰陣噏撈咗條片，片入面佢一路倒生可樂，一路用粵語讚佢浸味：

「

我依家呢好少畀我屋企啲小朋友飲汽水㗎，但係如果要飲呢就一定要飲呢個日本進口嘅生可樂，佢被日本網友稱之為日本可樂界嘅天花板，保留咗活性酵母，所以你睇下佢啲泡幾鬼勁，特別持久㗎。嘩！真係一世人點都要飲翻次，你唔好覺得佢貴啊，點都要畀屋企人飲翻啲好嘢吖嘛。

」

「

我從來都唔飲可樂嘅，我飲咗咁多年可樂，你真係唔好再飲國產嘅可樂，要飲，都係飲日本生可樂。

」

誇張嘅推銷言辭即刻引起網民反感，網民覺得佢盲撐來佬嘢，評論區好多用戶齊齊用粵語語音留言惡搞佢，而咁啱呢一排因為日本諗住倒核污水落海，網民就誇張噉形容飲咗生可樂之後，「賓周識旋轉發光」，甚至「成身生嗮賓周」，一嚟串翻呢位女網紅，二嚟暗諷日本嘅產品帶有輻射。

後嚟夏老實將呢條奶嗮嘢嘅片剷走咗，但係晨早就畀人單撈咗落嚟，而「生可樂」同「賓周」呢啲梗亦喺網絡上爆紅。