曾紀華家族

曾紀華家族係一個商業家族，祖籍福建惠安，喺香港以至台灣同南洋都有佢哋嘅生意，不過依家勢力大不如前。

家族史

曾紀華喺福建惠安出世，雖然出身書香世家，但係老豆曾廼銘死得早，佢讀完小學已經跟住大佬曾紀棠出晉江搵嘢做。之後佢更加隻身走去緬甸做工，後來因為出口大米賺到第一桶金，佢亦都喺緬甸識到佢第一個老婆王素英。

喺戰後，佢嘅生意更加多元化，初期有印刷廠，之後更加有地產、港口同銀行等等嘅業務。到1997年5月，曾紀華死咗，當時佢已經有100億港紙嘅身家。

曾紀華死咗之後，佢將大部分身家畀咗第二個老婆馮婉琳嘅兩個仔曾文豪同曾文能，包括當時嘅四間上市公司，不過由於擴張太快，加上亞洲金融風暴，曾氏兄弟要賣公司還債。2001年，細佬曾文能更加因為穿公司櫃桶底，搞到要去食皇家飯。

到2004年，大房嘅人喺台灣告二房嘅人，要求分到更加多遺產，不過敗訴收場。

雖然身家少咗一大截，但係曾氏兄弟仍然活躍名流圈子，細佬同好多女星都傳過緋聞，包括周汶錡同陸詩韻。大佬曾文豪就喺2018年同細21年嘅落選港姐李美慧結婚。

大房方面，大仔曾文仲曾經係中國地產商沿海家園嘅主席，亦都係主要股東之一，佢又做過第十一屆中國全國政協。

曾經有嘅資產

• 惠泰地產（而家叫中國寶力科技）
• 惠揚（而家叫平安證券集團，家陣除咗牌）
• 太平洋港口（而家叫新創建集團）
• 亞細安（而家叫茂盛控股）
• 台灣世華銀行（而家叫國泰世華銀行）
• 國賓大飯店

家族樹

• 曾廼銘
  • 曾紀棠
  • 曾紀華=王素英（大房）、馮婉琳（二房）
    • 曾文仲（大房）=于君明
    • 曾文虞（大房）
    • 曾文行（大房）
    • 曾文雯（大房）
    • 曾文珊（大房）
    • 曾文豪（二房）=楊穎欣（離咗婚）、李美慧
      • 曾昭怡（楊穎欣所生）=郭俊賢
        • 一個女
      • 曾昭亮（楊穎欣所生）
      • 曾昭令（楊穎欣所生）
      • 一個女（李美慧所生）
    • 曾文能（二房）=黃玲翠（離咗婚）
  • 曾紀殷