本州
(由本州島跳轉過嚟)
本州（粵拼：Bun2 Zau1）係日本最大嘅一個島，喺日本列島嘅中間，向北佢同北海道隔住津輕海峽相望，向南隔住瀨戶內海同四國相對，向西南佢就同九州隔住關門海峽同豐後水道。如果唔當澳洲係島嘅話本州就係世界上第七大嘅島。
地理
[編輯]本州從東北向西南延伸，全長大約1300 公里，闊 50 至 230 公里，總面積 230500 平方公里，佔日本總面積嘅六成，海岸線全長 5450 公里。本州係一個火山島，島上面直到今時今日都重有活躍嘅火山，周不時都有地震。本州最高嘅活火山就係好出名嘅富士山，高 3776 米。本州亦有好多條河，其中信濃川係日本最長嘅河。沿住本州嘅北便有一條山脈從東北一直延伸去到西南。本州嘅山區亦係島上西南同東北氣候差得遠嘅主因。
本州嘅氣候係季風氣候，一年之中由北方嘅温帶季風氣候慢慢咁變成南方嘅亞熱帶季風氣候，不斷交替。
人口
[編輯]本州嘅人口喺 2000年已經達到一億，主要集中喺關東平原上面，而住喺東京同橫濱附近嘅人口佔全島人口嘅 25% 左右。其他重要城市有京都、大阪、神戶、廣島、仙台同埋名古屋咁。日本七成半嘅大城市都喺本州，日本歷史上嘅政治同文化中心都喺呢度。
行政劃分
[編輯]本州喺地理上分做五個地方，政區一共有34 個縣：
- 中部地方：愛知縣、福井縣、岐阜縣、石川縣、長野縣、新潟縣、富山縣、靜岡縣、山梨縣
- 中國地方：廣島縣、岡山縣、島根縣、鳥取縣、山口縣
- 關東地方：千葉縣、群馬縣、茨城縣、神奈川縣、埼玉縣、栃木縣、東京都
- 關西地方：兵庫縣、京都府、三重縣、奈良縣、大阪府、滋賀縣、和歌山縣
- 東北地方：秋田縣、青森縣、福島縣、岩手縣、宮城縣、山形縣
農業
[編輯]本州係日本非常重要嘅農業地區，平原地區盛產米同蔬果，例如山梨縣就係國內主要嘅生果出產地。
