李祿

李祿，李錄（1966年4月6號—），部份中國媒體叫佢做李路，中國河北唐山人，美籍華裔投資家同埋對冲基金經理，對沖基金Himalaya Partners嘅創辦人，前八九民運學生領袖之一。

中國

李錄1966年喺中國河北省唐山市出世。嗰年正正係文化大革命開始嘅一年，父母都被送去「勞改」，佢被輾轉寄養喺一個礦工嘅家庭，直至十歲先同父母團聚。1976年，唐山發生大地震，搞到24幾萬人死咗，但佢同屋企人就好彩大難不死。1985年，佢喺唐山一中畢業，考入南京大學，最初修讀物理學，一年之後轉讀經濟學。1989年4月，佢到北京天安門廣場參與學生運動，去悼念胡耀邦。同年6月，六四事件爆發之後，佢逃去法國，最後到咗美國。

喺美國嘅生平

1989年尾，李錄到咗美國之後，即刻喺哥倫比亞大學發表關於六四事件嘅演講。1993年，佢喺哥倫比亞大學聽咗巴郡主席巴菲特嘅一次講座，令佢克服咗以往對股市投資嘅質疑，呢個亦成為佢日後從事金融業嘅踏腳石。1996年，佢喺哥倫比亞大學讀完經濟學、法律同埋工商管理嘅學位。1997年，佢自行創辦Himalaya Partners，管理風險創投基金同埋對冲基金。2003年，佢識咗巴菲特嘅副手、巴郡副主席查理·芒格，令巴郡成為佢嘅基金嘅主要客戶之一。2008年，佢向巴郡推介入股中國電池同汽車製造商比亞迪，令巴郡賺咗高達12億美金。2010年，佢被指有機會做巴菲特嘅接班人之一，一齊管理巴郡規模有成1000億美金嘅投資組合。