李重茂

唐殤帝李重茂（695年—714年）係大唐皇帝，唐中宗細仔，景龍四年（710年）六月登基，開元二年（714年）死，諡號殤皇帝。

生平

李重茂響武后延載元年（695年）出世，聖曆三年（700年）封做北海郡王，中宗神龍元年（705年）封做溫王、右衛大將軍，又做埋贈州大都督。景龍四年（710年）李顯俾人毒死，六月初四韋后暫管國家，改元唐隆。六月初七韋后立十六歲嘅李重茂做皇帝，韋后垂簾聽政。李重茂繼位唔夠一個月，六月二十號夜晚，李旦三仔臨淄王李隆基、太平公主連埋禁軍將領，起兵入宮，將韋后同安樂公主等人殺死，就係唐隆之變。

六月二十四號李重茂退位，睿宗復辟。睿宗景雲二年封做襄王，李重茂走出長安，去到集州，睿宗叫中郎將同武士五百人守備（即係監視同軟禁噉樣）。玄宗開元二年（714年），李重茂死喺房州。葬喺武功西原，死時年僅二十歲，好可能冇仔女。