東升西降

東升西降係中共總書記習近平提出嘅政治概念，意思係作為東方文明代表嘅中國已經崛起，將會取代以美國為代表，逐漸衰落嘅西方文明，呢句話同毛澤東講過嘅「東風壓倒西風」有異曲同工之處。

武漢肺炎大爆發之後，中共採取強力追蹤、強制檢測同嚴格封城等措施，比世界上絕大多數國家更有效控制疫情。習近平認為疫情為中國帶嚟「百年未有之大變局」，正當西方國家忙於應對疫情嘅時候，中國嘅經濟同工業生產已經回復正軌，體現中國制度嘅優越性。美國近年社會分化同黨派對立嚴重，國內政局混亂同國際影響力下降，而呢個時候中國比西方國家更有效應對疫情，加上經濟、科技水平同軍事力量快速增長，呢啲都係「東方西降」嘅表現。

不過新加坡總理李顯龍喺2021年8月提醒中國，話「東方西降」嘅概念係錯嘅，佢認為美國就算犯錯，之後都可以重塑自我，並且重新振作，而且美國可以吸引嚟自世界各地嘅人才，充滿活力。不過李顯龍同時警告中美之間嘅衝突會帶嚟嚴重後果，兩國應該互相交涉，避免衝突係至關重要，佢點名喺臺灣問題上確實有發生「誤判同錯判」嘅危險。