松柏塱

松柏塱（英文：Tsung Pak Long）係香港一條圍頭同客家雜居嘅圍村，位於香港新界上水西部泛濫平原嘅淡水濕地，具體位置爲大頭嶺、青山公路、塱原同石上河之間。松柏塱村由黃、劉、温、陳、李、鄺及簡姓七個宗族喺20世紀初期左右建立，村前建有五間呢五姓族人嘅祠堂。村內唔少古建築仲保留原來風貌，可以講係香港而今保存得至好嘅客家圍村。著名練馬師簡炳墀係松柏塱原居民，試過獲選為松柏塱村村長。由於松柏塱一開始就係雜姓村落，其內部亦分爲唔同姓氏嘅聚居群落，當中最出名嘅就係客家圍。粉嶺公路起好之後，松柏塱分開咗南北兩部分，由行人天橋連接，松柏塱村主體位於粉嶺公路北面，公路南面亦有少量村屋，高爾夫景園同愛園別墅都屬松柏塱範圍之內。

松柏塱客家圍

客家圍（英文：Hak Ka Wai），位於松柏塱村嘅南部，通稱松柏塱客家圍（英文：Tsung Pak Long Hak Ka Wai），由來自沙頭角荔枝窩嘅黃建常及黃建文兄弟喺大概1903年開始起，1920年代完工。黃氏兄弟都係十九世紀末及二十世紀初嘅華人領袖，兩個人都係第一屆鄉議局嘅成員，黃建常係捐款成立廣華醫院嘅總理之一，黃建文就做過客家組織祟正總會嘅司庫。

客家圍內總共有兩排村屋。前嗰排起好先，後來起埋後嗰排。圍村內亦包括一座書室、一間雅緻嘅祠堂鍚宗黃公祠及一座三層樓高嘅更樓，成條村四周起咗堅固嘅城牆。當時黃氏特登喺惠州請咗五十個技術工人負責起樓。

客家圍建築群至今都相當完整，文物價值甚高，客家圍內嘅民居、更樓、圍牆、圍門、書室及鍚宗黃公祠已經俾古物古蹟辦事處列為一級歷史建築。

五大祠堂

松柏塱有五間祠堂並列，分別係陳氏家祠、黃氏家祠、劉氏家祠、鄺氏宣城堂及簡氏敦厚堂，都喺1930年代起，以代表松柏塱五大氏族。每逢節慶氏人就會齊集祠堂，不過鄺氏、劉氏同陳氏嘅點燈儀式就會喺集成堂而唔係自己個祠堂舉行。

五間祠堂俾古物古蹟辦事處倡議列為三級歷史建築。

陳氏家塾

陳氏家塾喺1910年代起，同時係陳氏嘅書室、祠堂同居所。博文學校建成後，取代咗家塾嘅教育功能。

家塾俾古物古蹟辦事處列為三級歷史建築。

博文學校

博文學校由松柏塱村民喺1920年建立，係新界第一間註冊學校，亦係最早期嘅資助學校之一，當時政府每年向學校資助港幣60元辦學。學校由校舍及高座組成，喺1948年、1954年同1962年擴建過，擴充課室接收來自第啲村落嘅學生。日佔香港期間，學校被迫關閉，去到1946年先至復課。1950年，學校首次開辦6班小學，係新界教育發展嘅里程碑。1965年，學校成立博文幼稚園，規模盛極一時。踏入1980年代，學校面對市區學校嘅競爭同收生率日漸減少嘅威脅，入學人數下降。1993年，學校轉為全日制並開始接收內地學生，之但係到2000年代卒之停辦。而今校舍主樓及1954年起嘅校舍俾古物古蹟辦事處列為三級歷史建築。