柴灣角

柴灣角（Chai Wan Kok）係香港一地，喺荃灣西便。佢原本係海角，家下係荃灣新市鎮一部份，擴大指介乎荃灣市中心同荃灣西約之間一帶，包括山同填地。

史

早期文獻，柴灣角有香港鄧氏族人嘅祖墳，名三潭印月。香港市政局出版嘅《香港文物》話，柴灣角出土過新石器時代同埋漢代嘅文物。

英人地圖所示，柴灣角係介乎兩涌之間，一東一西，構成一海灣，至於此灣係咪叫柴灣，而角位係咪喺西涌之處，就唔可考。灣爲涌口灘地。家下翠豐臺，就正正兩涌之間，介乎海同灘之地上。東涌口約爲家下安育路，而西涌口約翠豐臺南角，青山公路處。柴灣角嘅柴灣，係極尋常嘅地名，香港島東北亦有柴灣。可能指浪柴，卽學名紅樹木，但今日已不可考。

一八九八年，英國由大清租新界後，柴灣角亦隨之入香港領域，柴灣角地近荃灣，是爲荃灣之約內。而爲咗方便交涌管治，無耐就開咗青山道，卽家下叫青山公路。青山道九咪處，就係柴灣角。當時呢段青山道，係起喺海上，灣對出嘅。呢段時期唔無村無圍，只有零丁嘅屋，同丁屎咁大嘅田。最近嘅村，東面海邊嘅白田壩，同北面一山之隔嘅涌角。

之後有零星工業發展，亦有人起寮仔住。一九二九年，《香港工商日報》提及有亞細亞煤礦公司辦事處。而一九三三年，柴灣角有寮仔，住有客家人。一九三四年，西面嘅下花山村，有西竹蘭寺，要經柴灣角落山，靠青山道往來。

到咗二十世紀六十年代，此灣對出填海，由灣至大涌道一地，叫柴灣角工業區。東面一涌，導入填地明渠，先至出海，家下明渠已蓋成暗渠，喺柴灣角變電話站東側。西面一涌，因開山，水導入東涌而斷流，導流喺翠豐臺後便。

填地一帶，有柴灣角街，由原柴灣角，直指大涌道。

除咗填地之外，荃景圍山上一帶住宅區，亦歸入柴灣角。以前呢帶係工業區，後尾工業淡出，住宅替代。當中較大有荃威花園，亦有荃灣港安醫院同柴柴灣角天主教小學。元荃古道荃灣入口，亦喺呢帶山上。