梁蔭棠
| 梁蔭棠 | |
|---|---|
| 職業 | opera singer、演員  |
| 風格 | 大戲 |
[改維基數據] | |
梁蔭棠（1913年—1979年10月18號），本名梁蔭洪，廣東南海人，係粵劇演員。佢精通小武同旦角行當，南派武功好嘢，剛柔兼濟，當其時人稱粵劇界嘅「武探花」，戲行人尊稱「一哥」。佢首本戲係《趙子龍催歸》、《盜御馬》、《周瑜歸天》[1]。
生平[編輯]
1913年喺佛山普君墟出世，初時叫梁蔭洪。佢好細個就無咗老豆，老母打紗維生。7歲就喺茶樓做嘢。10歲，老母過埋身，五叔梁炳介紹佢去廣州一間鋪頭做雜工。佢堂大佬係著名喉管演奏家梁秋，發覺佢聲喉靚，仲識吹喉管，於是乎過多兩年，叫佢跟自己嘅「新春秋」班學音樂。後來，轉咗跟男花旦馮小非，跟住喺「鈞天樂」劇團做馬旦。14歲做包尾花旦，起埋藝名，就叫「梁蔭棠」[1]，嗰時人稱「雞仔蔭」。金牌小武桂名揚好賞識佢，收佢做入室弟子，佢後來亦成咗粵劇「桂派」嘅代表人物之一。15歲轉入男女班，做正式「拉扯」，拜武術家陳斗為師。20歲喺「錦添花」班同陳錦棠合作，拜陳錦棠做師傅，未有一年就紮咗做正印小武。跟住又入「日月星」班，同桂名揚合作。後尾佢又跟武生少達子學《六國封相》公孫衍嘅「坐車」功架。又拜薛覺先為師，學各種戲路。又跟周鋒、周標呢啲名武師學武[1][2]。
1952年至到1958年，入「勝壽年」、「冠南華」、「新世界」劇團，仲做正印小武。1959年，入佛山地區粵劇團，做過佛山地區粵劇團副團長、佛山地區粵劇院院長，培養咗曾慧、梁廣洪。1978年，重新整理再做《趙子龍催歸》。
藝術成就[編輯]
梁蔭棠嘅聲喉繼承咗「桂腔」，仲吸收埋新馬師曾同何非凡嘅特色。演《武松》「飛雲浦」嗰時，參考京劇小武李少春嘅演技，內場唱咗句首板先，出場再唱高腔，咁一亮相個氣勢經已鎮住全場。佢跟過少達子、薛覺先、周鋒學做戲，三節棍、單刀、醉拳、洪拳、蔡李佛拳都精通，劇院門口逢親黏「今晚梁蔭棠加演三節棍」，全場實爆滿。佢亦跟過桂名揚學「鑼邊花」，槌槌都乾淨利落。《七虎渡金灘》佢演楊繼業，「碰碑」嗰時嘅「屈腰」同「三起三落」，表現出南拳北腿嗰種穩重同靈活。《趙子龍催歸》「甘露寺」嗰場，唱霸腔大滾花出場好有氣勢，「亮相」、「關目」、「車身」夠嗮威，「催歸」嗰場嘅「單腿望月」、「磋步」、「走圓台」呢啲動作亦有自己風格，功架戲融入咗南派武功，人稱「翻生趙子龍」[1]。