歐陽炯

歐陽炯^{[註 1]}（粵拼：au1 joeng4 gwing2；896年—971年），係中國五代十國後蜀到宋初嘅官員、詞人，益州華陽人（而家四川成都）。歐陽炯係花間派詞人，《花間集》收有佢嘅詞17首。

生平

歐陽炯嘅老豆係歐陽珏，係唐朝通泉縣令（而家射洪）。佢出世喺唐昭宗乾寧三年，早年入仕五代十國中嘅前蜀，當時係後主，做中書舍人，前蜀滅亡後歸後唐，做秦州從事（而家甘肅天水）。孟知祥守成都，佢就返咗鄉下。

後蜀立國，佢繼續做中書舍人，廣政十二年（949年），後蜀後主任命佢做翰林學士，950年，歐陽迥知貢舉、判太常寺。後遷禮部侍郎，領陵州刺史（而家四川仁壽），轉吏部侍郎，加承旨。961年，拜門下侍郎兼戶部尚書、平章事、監修國史，成為宰相。

965年，宋朝滅蜀，歐陽炯歸咗宋朝，做右散騎常侍，之後係翰林學士，轉左散騎常侍。因爲佢擅長吹笛，宋太祖召過佢去偏殿演奏。佢又識寫詞，風格委婉，善寫女子姿態。開寶四年（971年），宋朝滅南漢，上頭想派佢去祭南海，佢詐病唔去，得失咗太祖細佬趙光義，畀皇帝罷職，改任本官分司西京而死，年七十六歲。

佢喺蜀國時，西蜀犬馬聲色，君臣都沉溺喺娛樂中，宋太祖就認爲從佢識音樂填詞呢點就睇出。但歐陽炯喺之中算係樸素嘅人，唔多奢侈，呢點亦畀人讚。

歐陽炯屬花間派詞人，係繼溫庭筠、韋莊後又一大詞人。佢來過嶺南，寫低有關嶺南嘅詞。佢現今存詞47首，分別收錄喺《花間集》同《尊前集》。

南鄉子

路入南中，

桄榔葉暗蓼花紅。

兩岸人家微雨後，收紅豆，

樹底纖纖擡素手。

巫山一段雲

春去秋來也，愁心似醉醺。

去時邀約早回輪，及去又何曾。

歌扇花光黦，衣珠滴淚新。

恨身翻不作車塵，萬里得隨君。

春光好

花滴露，柳搖煙，

艷陽天；

雨霽山櫻紅欲爛，

谷鶯遷。

江城子

晚日金陵岸草平。

落霞明，水無情。

六代繁華，暗逐逝波聲。

空有姑蘇臺上月，如西子鏡，照江城。