殺人十八甫

殺人十八甫（粵拼：saat3 jan4 sap6 baat3 pou2）（甫讀普）係廣州城畀清軍屠城時留低嘅民間傳說。呢場大屠殺史稱庚寅之劫，喺《清史稿》嘅第234卷同好多嘅地方縣誌都紀錄咗，不過相關史料亦就得《清史稿》同廣東地方文獻。而17世紀來華嘅意大利人──耶穌會傳教士衛匡國、荷蘭人莊紐賀夫都記寫咗呢場劫難。呢句話重有下文，合埋就係「殺人十八甫、填屍六脈渠」，講嘅就係清軍屠城時嘅殘忍法、以及廣州城嘅慘像。同時呢個古仔亦係關於廣州十八甫呢個地名嘅民間解釋。

古仔

尚可喜入侵廣州

清朝初期（17世紀中），平南王尚可喜帶清兵打廣州，結果畀民眾猛咁爆佢頭。尤其係清兵到咗家陣廣州市天河區龍眼洞時，遇到嘅抵抗令佢哋死咗好多兵將。當佢哋兵臨大北門時，又畀守城武裝打到損兵折將，最後好艱難先攻陷廣州，因爲損失慘重，尙可喜激到生蝦噉跳，想報復廣州，於是落令屠城3日，從西門口開始，殺夠十八鋪路爲止。

度橋救人

當時王府入面有個官叫王湘泉，聽到殺人十八鋪，嚇親：「1鋪=10里，18鋪=180里路，都唔知要死幾多人。」後來佢度（dok⁶）咗條橋：「鋪」「甫」可以通假，啲清兵初來又唔知廣州係點嘅，一於搏下呃佢哋，免得死咁多人。

裝咗18嚿有「鋪」字嘅牌

王湘泉度咗條噉嘅橋，就嗌兩隻兵仔來，整咗十幾嚿木牌，從「第一鋪」開始一路寫到「第十八鋪」，趁啲人瞓覺唔多覺時安啲牌。佢哋響家陣六脈渠嘅第一津開始，計做「第一鋪」，過咗條街安「第二鋪」，又過廿卅米，安「第三鋪」，屈個彎，裝「第四鋪」，之後安到「第九鋪」時，發覺條街鬼噉長，驚清兵殺殺下發覺咗，於是以六脈渠爲界，分成「上九鋪」「下九鋪」，就來天光時，裝曬所有木牌。

清兵殺人

遞日，啲清兵就奉命去殺十八鋪路嘅人，因為佢哋唔知十八鋪路究竟係點，就按住啲木牌一路殺人。當時好多人知道清兵殺到埋來，於是匿曬喺六脈渠，咁啱落咗場暴雨，渠水暴漲，浸死曬啲人，所以有講「殺人十八甫、填屍六脈渠」。

去金字邊

後來，住響呢十八鋪嘅人驚清軍發覺有警轟，於是靜鷄鷄去咗「鋪」字嘅金字邊，變做「甫」，變成咗「十八甫」。

十八甫地名攷釋

呢個古仔點講都好亦就係個古仔，至於「十八甫」嘅「甫」係咩意思，有下面幾個講法：

百越詞

有人話，「甫」字其實係源自百越話嘅詞，而家廣東地名入面，諸如「甫」、「布」、「埔」、「圃」、「浦」呢啲詞都係百越話嘅寫音，呢個詞嘅意思係「村」噉解。比如從化江浦、廣州嘅黃埔、東圃，呢啲地名嘅尾字都係「村」噉解。

不過有人質疑，比如話而家光復中路係六七八甫所在，嗰度先595米長，點容納到3條村？

舖頭

喺明朝嘅史料入面，呢啲「甫」又寫「舖」。自明朝開始，西關嘅商舖就好多，集中嘅地方就嗌做「舖」，後來個「舖」字寫成「甫」。

商人自衞組織

就話明朝時，廣州同佛山嘅商人爲咗防賊，成立咗商人自衞組織，就嗌做「舖」，「十八甫」就係話呢度曾經有18個商人自衞組織。

碼頭

呢種講法認爲「甫」嘅原字係「埗」，因爲廣州有「甫」嘅地名，往往附近都會有嗌做「水腳」嘅。比如民國三十七年《廣州市街道詳圖》就有三甫水腳紀錄，清朝《廣州城坊誌》亦有第六、八、十四甫水腳嘅記載，直到而家，中山七路都有四甫水腳。

兼且廣州無第一甫，得第一津，有人話呢個名嘅意思就係「第一甫通津」，津係指大碼頭，而甫係細碼頭。十八甫原名蜆子埗。

平地

廣東人將平坦嘅荒地嗌做「埔」，「埔」係「甫」嘅原字，十七個甫係話第一津之後十七處平地。

依家有「甫」字嘅地名

從清初開始，第一津到第十八甫嘅地名用到而家，其中上下九係好出名嘅商業步行街。

俗話

廣州人有句俗話：第一津——冇譜。就係話十八甫之中唯有第一唔嗌甫。

重有句俗語咁講：人好你話好，唔識花共草，行到第一津，完全冇嗮甫。

參攷

• 俗話廣州 廣州出版社 ISBN 7-80655-150-6/K·18
• 俗話廣州 粵語協會
• 廣州人知道 十八「甫」，甫字的由來嗎~？ 開心網
• 十八甫的傳說 廣州圖書館
• 「十八甫」的由來（廣州市） 廣東文化網