毒馬案
毒馬案，係香港賽馬史上最轟動一件事，案件發生响1969年至1970年間，當時廉政公署重未成立，騎師彭利來連同馬伕、騎馬人等五名同馬會相關嘅人，先後向餵最少六匹賽駒食砒霜，以影響馬匹作賽表現，馬會獸醫响賽後檢查時發現馬匹呈腹瀉嘅徵狀，至揭發案件。
1971年2月10號香港警方拉咗彭利來等五人。毒馬案响同年3月22號開審。案中五名被告被控串謀向馬匹落毒同埋詐騙投注者，五個被告全部罪名成立，其中主謀彭利來判刑兩年。之後提出上訴，分別獲減刑，彭利來減刑至十八個月，但服刑三個月後，1972年10月以健康理由獲釋，1973年5月中，彭利來因胃癌响加拿大多倫多病死。
影響
[編輯]毒馬案事後，馬會雷厲風行，時任主席桑達士爵士响英國禮聘彭福將軍做馬會總經理，進行一系列嘅大刀闊斧改革措施，响1971年10月開始，將香港賽馬全面職業化，設立見習騎師學校，培訓各方面賽馬人才，全面加強馬房保安工作，對練馬師同埋騎師實行制度化管理，規定騎練須領有馬會發出嘅牌照先至可以策騎、練馬，亦都嚴禁騎師落注及向練馬師同馬主以外人士索料，重規定見習騎師响受訓期內，一定要住宿舍及唔可以過奢華生活，所得獎金須由馬會保管到畢業為止，將馬圈陋習徹底清除。