民園麵家大牌檔（2005年）
民園麵家（Man Yuen Noodles），係香港一間執咗笠嘅麵檔，喺香港島中環荷李活道68至70號A，出名菜式有牛腩、豬手同水餃。
民園麵家喺1925年開張，本嚟係喺中環伊利近街嘅一個大牌檔，持牌人姓黃，之後傳畀個仔黃光慶。1982年，李氏夫婦入股同黃光慶一齊經營。2005年，黃光慶死咗，政府跟嗰時嘅條例收返牌照唔畀轉讓，引起社會關注，最終李氏夫婦都要交還牌照，將麵檔搬入附近嘅地舖繼續經營。
2015年底，李氏夫婦宣佈因為自己年紀大，仔女又無意接手，喺2016年3月執笠。
