氹仔嘉樂庇總督馬路巴士奪命交通意外
氹仔嘉樂庇總督馬路巴士奪命交通意外發生響2018年4月15號，意外搞到一個阿伯死咗，亦係嗰年澳門第四單致命嘅交通意外，重印證咗禁咗兼職車長返工都解決唔到巴士嚴重交通意外嘅問題[1]。
背景
[編輯]2018年4月15號朝早九點左右，氹仔嘉樂庇總督馬路中段嘅斑馬線，八十歲嘅阿伯行緊斑馬線，被一架新福利AP1大巴撞底，消防到場嗰陣阿伯個頭出血，意識模糊，送去山頂醫院搶救，之後中午宣佈搶救無效傷重死亡[1]。
結果
[編輯]交通警
[編輯]2018年4月15號，治安警話，事發響朝早九點左右，姓王嘅八十歲阿伯響斑馬線過緊馬路，被巴士撞底，消防到場嗰陣阿伯個頭出血，意識模糊，送去山頂醫院搶救，之後宣佈搶救無效死咗。涉事司機經酒精檢測證實車長體內血液酒精含量係零，冇飲酒[2]。
巴士公司
[編輯]2018年4月15號，新福利巴士公司回應話經初步調查，車長揸AP1響氹仔嘉樂庇總督馬路站開車到斑馬線，掂到一個八十歲嘅阿伯搞到佢受傷，送到山頂醫院之後宣佈搶救無效死咗。涉事車長係全職車長，五十九歲，有揸廿七年大巴經驗，行駛呢條線有兩年半，最近響4月13號休假，每日工時係九個鐘頭廿七分（唔包攞車收車時間），通過酒精測試，最近一年冇發生交通意外，涉事車輛響3月完成車輛保養。重話會協助死者家屬處理善後事宜，配合相關部門調查呢件事故原因，同時持續加強各項安全管理措施，保障行車安全[1]。
2018年4月16號，新福利巴士公司副總經理李啓見話，對再有巴士撞底行人嘅致命交通事故事件深表遺憾，亦會配合警方調查。事發嗰陣啱啱開工兩個鐘，而家已經停職，佢重話會儘快幫所以巴士加裝監測系統，同埋完善監控中心，實時監控巴士安全，亦會對車長駕駛安全評分。新福利響3月亦已經檢測巴士咗四千架次巴士[3]。
交通事務局
[編輯]2018年4月16號，交通事務局局長林衍新話，當局同三間巴士公司都高度重視巴士安全，今年截止4月1號，有三十六個巴士司機因為駕駛安全原因被炒，多過2017年嘅三十二位，兩年前已經要求巴士平均車速降到每個鐘五十公里，有啲地方重降到每個鐘三十公里。對巴士「衝紅燈」零容忍，而家巴士上面都有監察設備，如果發現巴士車長衝紅燈會即炒。未來簽訂嘅新合同亦構思引入對安全紀錄良好嘅巴士公司，可優先攞到新路線。對於有網上傳聞話當局將會削減部分繁忙時段路線嘅班次，嚟騰出預算畀個別巴士公司引入新嘅混合電動巴士，林衍新話，當局一直想方設法配合繁忙時段巴士出行，唔會資助某一間巴士公司，佢又話網上經常流傳不實言論，佢唔會再評論[4][5]。
分析
[編輯]車長不足被逼加班安全性下降
[編輯]2018年4月11號，運輸工務司司長羅立文帶領佢轄下嘅部門局長以《澳門未來基建發展》為題到橫琴嘅澳門大學同大學青年交流互動。其間交通事務局局長林衍新話：『巴士車長人工平均兩萬六，重有間巴士公司有一個月出過五萬幾蚊添。』，之後羅立文話：『你再講多兩句佢哋唔去讀書去嗮做巴士司機。』，林衍新又回應：『歡迎嗱，我哋歡迎。』，突顯澳門巴士司機嚴重不足，繼之前俾利喇街同飛能便度街交界巴士奪命交通意外停咗三十幾個兼職車長之後，情況雪上加霜，局長希望講到巴士車長高人工來吸引大學生揸巴士解決人力不足問題，但係吸引唔到大學生揸巴士原因，係人工低、工時長嘅問題，有多個公眾響社交平台話大學生一出社會都喜歡投身紀律部隊，原因訓練嗰時薪俸點已經係二百二十點（即係底薪一萬八千七百蚊葡幣）；正式成為紀律部隊之後，起薪點就調升到二百六十點（即係底薪二萬二千一百蚊葡幣），都重未計其他津貼，同埋唔使加班，反觀車長三間巴士底薪都係大約一萬四千蚊左右（未計其他津貼），返工攞車同收工收車都係唔計工時，只有幾十蚊左右津貼，之後加埋其他津貼唔計班先有兩萬蚊左右，但係一撞車或者畀人投訴就會將津貼左扣右扣，再加上部分巴士公司連雙糧都冇，另一方面因為車長人手不足，要長期被逼加班犧牲瞓覺時間搞到行車唔安全先攞到補水錢先會去到局長話平均每位司機人工二萬六左右，但係紀律部隊就底薪唔加班就已經係二萬幾蚊，所以每年政府開考紀律部隊都有過千人申請，但係應徵做車長就冇幾多人。而同樣響2月香港九巴翻車事故後，九巴就將安全獎同服務表現獎津貼一齊納入做底薪一部分希望改善車長人工吸引人才[6][7][8]。
炒兼職巴士司機解決唔到問題
[編輯]2018年1月10號，新時代8號大巴撞死過斑馬線嘅行人，由於揸車嘅司機係兼職，所以搞到交局下令全部停嗮三間巴士公司兼職返工，導致司機唔夠問題雪上加霜，導致巴士公司強制要求全職加班補返空咗嘅班次，重引發埋兼職有事就禁兼職，噉全職有事就禁咩嘢嘅輿論，但係響呢事件同樣大巴響斑馬線撞死行人，但唔同係全職司機出事同唔同巴士公司，就冇上次噉大陣仗，有意見質疑政府偏袒某間巴士公司，但16號朝早召開嘅記者會度林衍新被記者問到有關問題就回應唔會偏袒某間巴士公司[9][3]。
政府教育方式誤導斑馬線大嗮
[編輯]2018年1月10號，新時代8號大巴撞死過斑馬線嘅行人，所以治安警響澳門各區放蛇企暗位觀察捉唔讓行人過斑馬線，2018年2月6號響林茂海邊大馬路一帶捉唔讓行人過斑馬線，之後行人過斑馬線都有車讓行，忽略咗過馬路要睇清楚來車速度，就直接行出馬路，導致慘劇發生[10]。
睇埋
[編輯]攷
[編輯]- ↑ 1.0 1.1 1.2 （繁體中文）巴士公司：涉事車長有27年駕駛經驗，力報，響2018年4月15號搵到。
- ↑ （繁體中文）疑過斑馬線遭巴士撞倒，力報，響2018年4月15號搵到。
- ↑ 3.0 3.1 （繁體中文）新福利將實時監控巴士安全，澳廣視，響2018年4月16號搵到。
- ↑ （繁體中文）安全紀錄良好巴士公司或可優先取新路線，澳門日報，響2017年4月16號搵到。
- ↑ （繁體中文）交局對巴士「衝紅燈」零容忍，力報，響2017年4月16號搵到。
- ↑ （繁體中文）澳門大學與學生真情對話，澳門有線電視，響2018年4月11號搵到。
- ↑ （繁體中文）殺人大巴，巴士討論區，響2018年4月16號搵到。
- ↑ （繁體中文）【大埔翻巴士】消息指九巴擬加薪6.8% 減駕駛時數至10小時，蘋果日報，響2018年2月21號搵到。
- ↑ （繁體中文）社會還有公平，公道嗎？，馬路討論區，響2018年4月15號搵到。
- ↑ （繁體中文）當局嚴打車輛不讓行人先行，正報，響2018年2月7號搵到。