汽車渡輪
汽車渡輪係載汽車過海嘅渡輪，喺未有海底隧道同大橋之前係汽車過海嘅主要途徑，呢種交通工具已經逐漸式微，而家汽車渡輪主要用途係運載易燃物品同爆炸品嘅車輛，因為呢啲車輛唔可以用隧道。
歷史[編輯]
香港[編輯]
香港第一條汽車渡輪航線係由油麻地小輪開設。1926年，油麻地小輪公司鑑於汽車過海嘅需求日增，於是向港府申請興建汽車渡輪碼頭，並獲得香港第一條汽車渡輪航線－佐敦道碼頭至中環統一碼頭汽車同乘客混合航線嘅經營權，並喺1933年3月投入服務。1972年，紅磡海底隧道通車，地下鐵路過海路段亦喺1980年代通車，嚴重打擊汽車渡輪嘅經營，因此開始陸續重組同停辦。1998年，最後一條擁有30多年歷史嘅北角至九龍城公共汽車渡輪服務亦停辦。
而家香港只淨低來往北角至觀塘同北角/觀塘至梅窩嘅汽車渡輪，只向運載第一、第二同第五類危險品嘅車輛提供服務，除咗司機同跟車工人之外，唔准接載乘客。
但係，香港現有嘅3條海底隧道收費不均，收費最平嘅紅隧更長時間處於擠塞，因此，社會一直被要求加快研究復辦公共汽車渡輪嘅可行性[1]。
危險品[編輯]
香港[編輯]
根據香港法例第295章《危險品條例》所管制嘅危險品[2]，運載以下類別危險品嘅車輛唔可以用隧道，一定要用汽車渡輪過海：
- 第一類：爆炸品同爆破劑
- 第二類：壓縮氣體
- 第一分類：永久氣體
- 第二分類：液化氣體
- 第三分類：溶解氣體
- 第五類：發出易着火蒸氣嘅物質
- 第一分類：引火點低過攝氏23度嘅物質
- 第二分類：引火點喺攝氏23度或高過攝氏23度但唔高過攝氏66度嘅物質
- 第三分類：引火點喺攝氏66度或高過攝氏66度嘅物質（只適用於柴油，爐油同其他引火點喺攝氏66度或高過攝氏66度嘅物質）