洪崖洞商業街
洪崖洞（粵拼：hung4 ngaai4 dung6*2）係嘉陵江臨江崖壁上高嘅一個天然崖洞[1]，亦係重慶主城區嘅一個景點，喺重慶母城洪崖門（而家渝中滄白路）。舊時大石頭喺上高冚住呢個窿，周時會有瀑布沖落來，所以亦叫「滴水崖」。呢道曾經有宋朝元豐年間蘇軾、黃庭堅留低嘅題刻[2]。清朝被巴縣知縣王爾鑒定為「巴渝十二景」之一，即係「洪崖滴翠」。而家係條商業街，造型係江邊吊腳樓，有11層咁高。
- ↑ 唐冶澤、馮慶豪 (2007)。《老城門》。重慶出版社。頁 45-47。
- ↑ 曹學儉。《蜀中名勝記》。｢城西雉堞下有洞曰洪崖，覆以巨石，其下嵌空，飛瀑時至，亦名滴水崖。有元豐時蘇軾、黃庭堅題刻。｣
