浦江飯店

酒店外貌

 浦江飯店（粵拼：pou2 gong1 faan6 dim3） （簡化字：浦江饭店；英文：Astor House Hotel）原先係禮查飯店，係19世紀到20世紀上半葉期間上海嘅主要外資旅館之一。由英國蘇格蘭籍僑民彼得•禮查喺1846年創立，1861年禮查將飯店頂手畀另一位英國商人亨利•史密斯。1906年，由於公共租界計畫改建威爾斯橋成鋼鐵大橋以滿足開通有軌電車嘅要求，外白渡橋北嘅禮查飯店就咁要搬走，去到原址東北幾十米處重建。至1907年擴建成具有濃郁英國新古典主義風格嘅建築，樓高五層，係嗰陣遠東最出名嘅外商飯店之一。由於黐著碼頭聚集嘅百老匯路(宜家係東大名路)，設施服務一流，禮查飯店成為眾多外僑同海員嘅首選入住地方。禮查飯店舊時仲係上海灘重要嘅國際交流場所，各界名流、達官顯貴紛至遝來。

20世紀初，禮查飯店畀匯中洋行接盤。1920年代，又畀香港上海大酒店公司食咗。抗日戰爭期間，飯店畀日本人食咗。 光復後，業主收返產權，租畀建華房地產公司。國共戰爭時期，呢度做咗美國海軍俱樂部。

1959年，中共上海方面接管大樓，改名浦江飯店，專門接待外國客人同華僑。

1995年，畀咗衡山集團管轄嘅浦江飯店差啲畀拆除重建高星級酒店，好彩飯店嘅歷史淵源得到發現兼重視，得以修繕保留。

2017年12月29號，上海證券交易所同上海市衡山（集團）公司正式簽咗浦江飯店租賃合約，飯店年尾結業。上海證券交易所接手後，計劃將其做成上海證券交易所投資者教育基地，同國際交易所文化展示同埋交流基地，宣稱將喺文物管理部門監督指導同中外相關歷史建築保護專家嘅設計規劃下，最大限度確保做好建築嘅長期保護同維護工作，發揮歷史建築嘅使用功能。