深圳速度
 |
深圳速度係中國大陸形容建設速度好快嘅一個詞。呢個詞出自1982年11月到1985年12月嘅37個月期間，中國建築第三工程局有限公司喺承建深圳國際貿易中心大廈（簡稱國貿大廈）嗰陣時，創咗三日起一層樓嘅速度，喺當時嘅中國係絕無僅有嘅。國貿大廈起好之後，係當時深圳最高嘅樓，成為咗深圳嘅地標，而且周圍都因為國貿而畀人叫做「國貿商圈」。當時深圳嘅建設正喺度如火如荼咁快速進行緊，國貿嘅建設過程經過報導之後，成為深圳城市建設嘅一個典型畀人猛咁宣傳。所以「深圳速度」、「三天一層樓」係當時媒體提起深圳嗰陣時成日會用到嘅詞。
不過，起深圳國貿大廈雖然以快而出晒名，但係就唔係起所有樓都可以學到嘅，喺某尐地方就算係加長每日嘅工時都唔可能做到。其中有尐條件係自然因素，所以其他地方係未必做得到嘅。譬如話，深圳因為氣候嘅原因，石屎嘅凝固期短過中國大陸好多城市好多，而且喺施工嗰陣時加咗加速凝固嘅凝固劑，所以倒咗石屎之後可以快尐凝固，然後就起上面嗰層。另外，起緊嗰陣時重用咗幾層嘅樓板模板，唔使等下面一層搞掂晒先至攞走模板起上面嗰層，噉樣可以慳返唔少時間。
