深灣道

  提示：呢篇文講嘅唔係深水灣道。

深灣道

深灣道（Shum Wan Road）係香港島南區一條馬路，嚮南朗山以西嘅深灣同布廠灣沿岸，由北端南朗山道近揚海開始，向南伸展到近香港仔南避風塘防波堤，之後有一段路通去香港海洋公園大樹灣入口，以往被視為深灣道一部份，到2021年呢一段路定名做海洋徑（Ocean Drive）。

沿革

深灣道喺1969年通車，並喺同一年9月26號嘅香港憲報第1915號政府公告獲命名，而根據當時命名文件，嗰陣時嘅深灣道只係去到水警香港仔基地。大約1980年前後，深灣道延長到布廠灣，亦即係近香港仔南避風塘防波堤位置，再喺1984年隨香港海洋公園大樹灣入口啟用而延長到大樹灣，不過呢兩次延長，都未有安排同時喺憲報命名新路段，用返深灣道個名純粹只係約定俗成。一直去到2021年4月30號，香港政府先至將「新路段」安排憲報命名，其中香港仔南避風塘防波堤以北一段維持叫深灣道，以南一段就另行定名做海洋徑。

門牌號碼重覆問題

深灣道部份路段因為長期未有正式命名，門牌號碼登記混亂。其中水警香港仔基地門牌號碼係「深灣道28號」，但以南一批大約1980年前後出現嘅船廠，門牌號碼卻係由深灣道14號開始逐個數，一路數到29號，用埋馬路另一邊嘅單數門牌，結果除咗水警香港仔基地嘅「深灣道28號」被重覆使用外，滬江維多利亞學校嘅「深灣道19號」同香港仔遊艇會嘅「深灣道20號」亦被重覆使用。而位處「深灣道25號」同「深灣道26號」之間嘅醫院管理局深灣洗衣工場，就未有使用門牌號碼。

沿路主要地點

• 新會商會陳白沙紀念中學（深灣道1號）
• 包玉剛游泳池（深灣道2號）
• 南濤閣（深灣道3號）
• 深灣遊艇俱樂部（深灣道8號）
• 雅濤閣（深灣道11號）
• 滬江維多利亞學校（深灣道19號）
• 香港仔遊艇會（深灣道20號）
• 水警香港仔基地（深灣道28號）