港灣豪庭
港灣豪庭（英文：Metro Harbour View）喺香港九龍大角咀福利街8號，係一個住宅項目，地產發展商係恆基兆業同香港小輪。
港灣豪庭原本係油麻地小輪大角咀船廠同埋油麻地工業大廈舊址，隨住西九龍填海工程嘅進行，船廠已經搬去青衣島，油麻地工業大廈亦喺2000年拆咗，原址經過同政府修改土地用途之後，起咗樓面面積有成200萬平方呎嘅港灣豪庭，喺2003年5月入伙。物業由10座住宅同埋樓高4層嘅中型商場組成。住宅樓高45層，每層8伙，總共有提供3,520個單位，主要係兩房至四房嘅單位，面積由477方呎至到874方呎，部分單位設有主人套房及環保露台。
港灣豪庭近南昌公園、通州街公園、樂群街公園、九龍殯儀館、西九龍紀律部隊宿舍等等。
設施[編輯]
平台花園佔地9,800平方米，有幾項設施，包括流線型園景泳池、兩個兒童遊樂場、花園廣場、多個特色水池噴泉同埋草坪。平台花園亦有有蓋行人通道連接各座樓、住客會所同埋來往地面出入口嘅電梯大堂。
物業有20萬呎大型住客會所，設施有成30種，包括健身室、保齡球室、攀石練習場、桑拿浴室、卡拉OK 室、壁球室、電腦模擬高爾夫球室、桌球室、音樂練習室、親子烹飪室同埋舞蹈室等，畀唔同住戶嘅需要。
-
平台花園 -
住客會所(港灣活力坊) -
兒童遊樂場
商場[編輯]
港灣豪庭基座亦有20萬方呎大型商場，並且用超級郵輪做設計概念，喺2005年開咗。商場有係百貨公司、超級市場，便利店、多間地產代理、洗衣店、教育中心、診所、美容中心同埋茶餐廳等等。
平台花園事件[編輯]
港灣豪庭原址原本唔係私人住宅用地，以恆基為首嘅發展商為咗港灣豪庭嘅發展計劃等政府批准，主動提出喺發展計劃裏面提供公共休憩用地。所以政府喺批准港灣豪庭的發展計劃嗰陣，規定發展商「喺地段內起同管唔少於9800平方米嘅公共休憩用地同埋開放該用地畀公眾人士使用」。[1]物業起好之後，佢嘅平台花園（除咗會所同泳池之外）應該開放畀公眾使用，但係物業管理公司就一直無咁做，直至2008年頭由傳媒揭發之後，地政總署先至跟進，規定平台花園喺朝早7點至到夜晚10點開放畀公眾。[2]涉及其它物業的同類事件陸續被揭發。
有港灣豪庭小業主唔滿意，話自己買樓嗰陣，被發展商嘅售樓廣告誤導，以為平台花園係住客專用，而發展商就回應話售樓書已經講明平台花園係公眾地方。[3]
2008年4月6日，香港《蘋果日報》嘅一篇報道話亞洲電視嘅時事節目《時事追擊》曾經就呢件事訪問港灣豪庭嘅小業主，但係恆基就用抽起廣告向亞視施壓，結果節目裏面無播出呢段片，亞視同恆基都唔認有施壓嘅事。[4]
有港灣豪庭嘅小業主爭取將平台花園重新「私有化」，唔開放畀公眾使用。[5]2008年11月，有報道話香港政府地政總署研究緊豁免港灣豪庭地契中規定向公眾開放公共空間嘅條款，如果搞得掂，公眾將失去使用呢個平台花園嘅權利。[6] [7]
參考資料[編輯]
- ↑ http://www.info.gov.hk/gia/general/200703/28/P200703280205.htm
- ↑ 《地政總署：已提醒港灣須開放花園》 互聯網檔案館嘅歸檔，歸檔日期2020年4月5號，.，《明報》，2008年1月29日。
- ↑ 《港灣豪庭住客不滿 區議員促購回平台花園》，《明報》，2008年3月30日。
- ↑ 《霸佔平台事件 追訪最終抽起 恆基涉干預亞視新聞節目》 互聯網檔案館嘅歸檔，歸檔日期2008年4月9號，.，香港《蘋果日報》，2008年4月6日。
- ↑ 《港灣豪庭法團：吸煙放狗難管理》 互聯網檔案館嘅歸檔，歸檔日期2009年2月21號，.，《明報》，2008年11月10日。
- ↑ 《政府研究暫豁港灣豪庭開放公共空間 被轟幫業主解困 未能平衡公眾利益》 互聯網檔案館嘅歸檔，歸檔日期2009年2月21號，.，《明報》，2008年11月10日。
- ↑ 〈政府(建議)豁免開放港灣豪庭〉. 原著喺2008年12月5號歸檔. 喺2009年5月21號搵到.
