滅火筒

  「滅火器」跳轉到呢度。想搵臺灣樂團，請睇「滅火器樂團」。

壓縮氣體滅火筒

滅火筒，又叫滅火器，係救火嘅架生，裝住啲化學劑，用時就會出啲二氧化碳、泡沫、粉末、水、濕嘅化學劑、或者哈龍（Halon）氣，唔畀着火嘅嘢掂到氧氣，就燒唔落去。

傳統嘅滅火筒係有分顏色，唔同色代表筒裏面裝住唔同嘅滅火劑，而唔同嘅滅火劑有唔同嘅用途。唔同嘅滅火筒有唔同嘅操作方法，例如紅色筒身頂部有粒掣畀人拍落去嘅係水，奶白色筒身要將支滅火筒上下掉轉先有嘢出嘅係泡沫，黑色筒身有個氣壓表同埋喇叭型噴嘴嘅係二氧化碳，藍色筒身係乾粉末，重有一種黃/綠色嘅係哈龍，因為有毒所以家陣已經唔多見。但係今時今日大部份滅火筒都用晒紅色筒身，就連外形同埋操作方法都差唔多。

理論上，水係救大部份火嘅最理想工具，因為佢兼具降溫同隔絕氣體氧兩種功能；不過因為佢係導體容易通電，所以唔用得嚟救同電有關嘅火。唔少燒得着嘅液體都輕過水，用水救液體着火唔止無效重反而會累事。氣體滅火劑（二氧化碳、亞摩尼亞、哈龍、以至地鐵站以前用開嘅溴代三氟甲烷）基本上任何類型火都啱用，不過用嚟救液體火用泡沫以至乾粉都比較好。另外，某啲金屬會因為化學反應着火，用乾粉類滅火劑救呢類火效果尤其好。

滅火筒辨認

1997前英國／香港

種類	1997前英國／香港規定顏色	現行
水	紅色
泡沫	奶白色	紅色加奶白色說明標籤
粉末	淺藍色	紅色加淺藍色說明標籤
二氧化碳	黑色	紅色加黑色說明標籤
鹵代烷	綠色	禁用
濕粉	未有	紅色加明黃色說明標籤

中華民國（台灣）

標籤顏色	種類
（A類）白底黑字標示「普通火災用」	一般火災指木材、紙張、綿紗、布料、塑膠類等易燃物質。
（B類）黃底黑字標示「油類火災用」	油類火災指溶劑、油料類、液化瓦斯等石油系列物質。
（C類）藍底白字標示「電氣火災用」	電器類火災指電器類通電中設備（重未切斷電源嘅火災）。
（D類）標示專用類別文字	活性金屬好似鎂、鉀、鋰、鋯、鈦等引起嘅火災，或者或其他同水發生化學反應而燃燒嘅火災（通常會標明邊種金屬專用。）。

維修

滅火筒必須定時檢查維修，以確保效能及安全。大部份地區都規定滅火筒需要由合資格人士定期檢查。滅火筒日久失修唔單只要用嘅時候用唔到，重可能會因為壓力而爆炸。