消防學堂 (香港)

出自維基百科,自由嘅百科全書
Jump to navigation Jump to search

香港消防處轄下有幾個消防學堂去訓練消防員,包括現有嘅消防訓練學校、第日嘅消防訓練學院、西九龍救援訓練中心、救護訓練學校、潛水基地、以及坍塌搜救專隊訓練場。

消防訓練學校以及消防訓練學院[編輯]

消防訓練學校全景
消防訓練學校大門

消防訓練學校英文Fire Services Training School,縮寫FSTS)位於元朗八鄉,佔地約2.9萬平方米。消防訓練學校隸屬消防處嘅消防處總部總區,係消防處嘅主要訓練同培訓機構之一,所有新入職嘅消防員以及見習消防隊長都要「入學堂」接受基本及專門訓練,消防訓練學校亦係現職消防人員進行進階訓練嘅場地之一。

歷史[編輯]

消防訓練學校喺1968年創立。

搬遷計劃[編輯]

由於現代消防員需要面對比以前更複雜嘅緊急事故,需要速轉變嘅訓練,令前線人員能夠具備最先進嘅滅火以及救援技巧。但目前消防訓練學校漸見落後,設施唔夠,只配備基本嘅救火同救援訓練設施(包括3座訓練塔同1個操場);另外,馬鞍山消防局裏面嘅消防救護訓練學校(最多可以畀86名學員接受留宿訓練),使用率已經飽和,未能夠應付未來不斷上升嘅訓練人數;同時,該校嘅操場面積有限,最多可以容納40名學員同時使用、加上喺1986年創立、附設於油塘消防局嘅駕駛訓練學校以及位於啟德嘅臨時駕駛訓練場地亦相繼唔夠用。為提高訓練水平及專業質素,由2000年代開始,處方建議喺將軍澳百勝角起一座現代化、達到國際級頂尖水平嘅消防訓練學院(Fire Services Academy)[1]

2011年2月3號,香港政府決定斥資34億港元,喺將軍澳百勝角第78區起一座兼具消防、救護、及專門車輛駕駛訓練於一身嘅消防、救護訓練學校,咁做可以節省資源,並且方便教材調配,避免以往分散訓練所花費嘅時間[2]。此外,消防及救護人員處理緊急事故嘅時候,經常需要緊密合作及互相配合。建議中嘅訓練學校就可以同時提供消防以及救護嘅訓練設施,令兩方人員有更多機會一齊操練,提高人員之間嘅合作性及協調能力。詳細興建計劃2011年2月10號喺立法會討論,當中計劃書刊以新加坡民防部隊嘅訓練學校作為主要比較嘅參考例子,另外亦包括瀋陽、廣東、澳洲、英國、瑞典及美國等國家地區嘅例子。

消防處喺2012年年中將建議提交到立法會工務小組委員會,並且向立法會財務委員會申請撥款。同年5月27號,消防訓練學院會起喺將軍澳百勝角第78區、邵氏片場後面,工程將於同年8月動工,預計2015年10月完工。消防訓練學院投入服務後,消防訓練學校將會關閉。

設施[編輯]

現有[編輯]

消防訓練學校起緊嗰時,有一座操場、三棟操練塔及設有飯堂嘅宿舍。為咗不斷改進人員嘅救援技巧,消防處喺2000年代多次為消防訓練學校增加添置訓練設施,包括3間模擬樓宇火警嘅煙火訓練室,一間煙火特攻訓練室、模擬車輛火警、變壓器火警同火幕牆訓練設施。處方亦喺2000年代尾起咗一座呼吸器訓練大樓,令學員可以喺受到監察同控制嘅濃煙密佈嘅環境下,接受更上乘嘅訓練。

第日消防訓練學院可能有嘅設施[編輯]

「消防訓練學院」計劃佔地比現時嘅消防訓練學校大5倍有多,達到16萬1千平方米,備有全面嘅訓練組合以及多種獨立訓練場地同區域,分別用嚟進行唔同嘅特定訓練項目以及教授各種專門嘅技巧同知識。此外,消防訓練學院亦會引入環境保護設施同措施,包括設置地底水缸,用嚟收集操練用過嘅水循環再用,以及裝置排煙淨化系統,處理由滅火訓練時所產生嘅煙。

行政設施:

  • 辦公室
  • 會議室
  • 面試室
  • 茶水間

體能訓練設施:

  • 健身室
  • 跑步徑
  • 室內體育館

室內訓練設施:

  • 實火訓練設施
  • 室內拯救池
  • 火警意外調查訓練室
  • 消防工程實驗室
  • 化驗室
  • 救護訓練模擬實境室
  • 先遣急救員訓練室

室外訓練設施:

  • 佔地5.5萬平方米嘅斜坡(比起現有嘅成座消防訓練學校範圍大一倍左右),畀學習人員操練同埋進行大型事故表演練習用途。
  • 操場
  • 高空操練塔:樓高12層,設有玻璃幕牆同高空工作吊船,可以提高高角度拯救專隊人員嘅訓練程度。
  • 實火訓練大樓
    • 室內實火訓練設施:上述訓練設施模擬唔同嘅火災場景,包括地庫、酒店、工業樓宇、住宅及卡拉OK場地等,可以營造真實火災、視覺、聲效以及人造煙霧等效果,令受訓人員能夠喺一個受到監察及控制下嘅火災環境中提升救火技能。
  • 室內煙火特性訓練設施:由唔同模式嘅訓練室所組成,可以分別示範閃燃同回燃兩種經常出現喺香港樓宇火災嘅高度危險現象,可以加強人員喺極端危險情況下嘅應變能力同心理質素。
  • 室外實際情況訓練場地:
  1. 模擬鐵路隧道火燭以及拯救訓練嘅設施(包括車站以列車車廂):學員能夠學習有關處理鐵路同隧道裏面救火嘅技巧、調整派遣策略、密閉空間裏面工作嘅技巧、各種列車火燭時嘅救火方法、以及撤離民眾嘅方法。
  2. 模擬公路拯救區:可以為學員提供處理大型交通意外嘅訓練,學員可以透過上述嘅訓練設施嚟學習處理公路拯救嘅技術。上述訓練設施將會起喺一條模擬高速公路上面,呢條模擬公路上面有涉及各種車輛嘅交通意外,包括重型貨車、私家車同巴士等,為人員提供車輛穩定、切割技術同院前急救嘅訓練。
  3. 模擬運載燃料車事故訓練設施:可以加強學員處理油缸火警同爆炸嘅能力,呢個訓練設施會設有一架運載燃料汽車,車輛能夠模擬燃料車遇到交通意外之後洩漏燃料(例如液化石油氣或電油)嘅情況,重可以模擬油缸火災及爆炸。
  4. 模擬汽車火警事故訓練設施:學員可以透過呢個訓練設施學習處理各種涉及汽車嘅火警,訓練設施將會有一架車,呢架車能夠可以用汽體燃料模擬引擎、車廂以及油缸火燭嘅情況。
  5. 模擬船隻事故及水上拯救訓練設施:模擬船隻火燭場景,例如發動機、發電機及船艙等等位置嘅火燭。上述訓練設施主要包括發動機、鍋爐、高壓蒸汽以及熱油管道等,能夠提供唔同嘅場景畀學員訓練。
  6. 模擬油庫事故訓練設施:可以提高學員處理油庫火燭嘅整體救火技術以及學習點樣防止油庫火災蔓延。
  7. 模擬石油氣儲存罐訓練設施:學員可以學習處理石油氣罐因為壓力迅速增加而引致嘅爆炸同破裂事故嘅技巧,學員亦可以學習點樣作出適當嘅反應以防止滾起嘅液體擴展至蒸汽發生爆炸。
  8. 模擬加油及加氣站訓練設施
  9. 模擬飛機訓練設施
  10. 模擬坍塌搜救訓練區:可以畀坍塌搜救專隊用嚟做冧樓以及密閉場地嘅搜索拯救嘅密集式訓練[3][4]
  11. 模擬化工廠訓練設施
  12. 模擬塔式起重機事故訓練設施

駕駛訓練大樓:

  • 講學室
  • 模擬駕駛訓練室
  • 車輛配件貯存室
  • 室外駕駛訓練場
    • 以及支援設施:
      • 車房
      • 貯物室
      • 超過570個床位嘅宿舍
      • 飯堂
      • 廚房
      • 廚房貯物室
      • 貯物櫃
      • 更衣室
      • 消防器具貯存室
      • 危險品倉
      • 制服室
      • 急救室
      • 洗手間
      • 淋浴間
      • 機房
      • 停車場

教學大樓:

  • 樓高40層嘅救援訓練大樓(包括課室、資源中心、現場指揮系統訓練中心、消防裝置及設備示範室、以及修理工場)

公眾教育中心:

訓練[編輯]

消防學員[編輯]

消防學員初級訓練包括基本救火技巧、揸火燭車同埋應用各種救火同救援裝備、煙火特性訓練、呼吸輔助器訓練、救護學、體能訓練、消防條例、消防法例、防火、物理以及燃燒科學等[12]

見習消防隊長[編輯]

見習消防隊長除咗要學基本救火同救援技巧外,亦要接受指揮同領袖才能嘅訓練。見習期內,見習消防隊長要接受延續訓練,例如火警調查訓練以及管理學概念課程等。

見習消防隊目[編輯]

見習消防隊目(控制)需要接受初級訓練,以及為內部聘任嘅消防隊長提供入職培訓[13]

濕碎嘢[編輯]

消防棺材車[編輯]

消防學校裏面泊咗一架1957年出廠嘅退役消防車,呢架車配備一副可以「拆落嚟,靠梯腳兩個大轆四圍走,伸展到60英呎高」嘅手動救生梯,故此有名為「大樓梯」。現時,「大樓梯」車嘅唯一用途係做殉職消防人員嘅棺材車

消防處西九龍救援訓練中心[編輯]

消防處西九龍救援訓練中心。

消防處西九龍救援訓練中心英文Fire Services Department West Kowloon Rescue Training Centre)位於西九龍渡華路8號,同民眾安全服務隊總部接連,喺2006年11月6號啟用。西九龍救援訓練中心係消防處嘅主要訓練及培訓機構之一,主要功能係加強前線消防員嘅救火技巧。西九龍救援訓練中心亦提供持續訓練課程,包括模擬隧道同迷宮裏面進行搜索及救援,並喺唔同情況下進行真火訓練,以加強消防人員處理各類型火災同其他災難嘅技巧[14][15]

建築[編輯]

西九龍救援訓練中心由2006年11月6號起啟用,訓練大樓用咗超過9,000萬港元起,其餘設施用咗超過2,000萬港元。

西九龍救援訓練中心同民眾安全服務隊總部連接,操場、攀石牆同瓦礫堆等都係同民安隊隊員共用嘅設施。西九龍救援訓練中心嘅訓練大樓有9層,由地下至4樓都設有最先進嘅救援及滅火訓練設施,其餘5層就用作救援塔。為咗提高消防人員應付唔同類型火災嘅能力,訓練大樓內其中兩層更設有真火訓練室,入面有14個唔同嘅火場環境同相關室內模擬物,包括住宅區、酒店區、工業區以及卡拉OK等[16]

為咗準備應付可能發生喺香港海洋公園纜車、昂坪360、貨櫃碼頭同埋吊船等嘅嚴重事故、大廈倒塌及唔同類型嘅救援工作,西九龍救援訓練中心已經備有高空拯救工具及重型拯救工具,畀拯救人員靠繩索自由上落。此外,訓練大樓設有迷宮式搜索訓練場以及位於大樓地下嘅全長52米嘅模擬隧道等,用以提高消防人員喺密閉同狹窄空間內進行搜索同拯救等嘅技巧。

此外,救援中心設有嚴密嘅監察設施,以確保受訓者嘅安全,包括紅外線感應器、壓力感應器同閉路電視等等[17]

消防處救護訓練學校[編輯]

救護訓練學校

消防處救護訓練學校英文Fire Services Ambulance Command Training School)喺1992年創立,位於沙田馬鞍山鞍山里1號,附設於馬鞍山消防局。消防處救護訓練學校隸屬救護總區,係救護總區嘅主要訓練及培訓機構之一,所有新入職嘅學校救護員都要喺呢度接受26個禮拜嘅基本救護學以及專門嘅輔助醫療嘅留宿訓練,消防處救護訓練學校亦係現職救護人員進修同進階訓練場地之一,以及現職消防人員嘅急救及救護訓練、複修同進階訓練場地之一。

訓練[編輯]

救護學員同見習救護主任都需要接受26個禮拜嘅初級訓練,內容包括救護學、相關法例、情緒智商管理、步操、紀律、體能訓練及隨救護車實務練習等[18][19]

消防處潛水基地[編輯]

消防處潛水基地英文Fire Services Department Diving Base)係消防處潛水組嘅訓練基地,位於九龍昂船洲政府船塢。基地耗資逾1.44億港元建造,2009年10月竣工,土地面積達2,182平方米,建築面積達5,550平方米,樓高4層,係亞洲最先進嘅消防潛水訓練設施。

沿革[編輯]

2008年,受到龍鼓水道撞船意外啟發,消防處引入模擬沉船嘅強化訓練,初步模型將於2010年底完成。

潛水組嘅消防員現時可以喺最深水底42米處執勤,但係由於嗰時起緊嘅屯門至赤鱲角連接路會有深達80米嘅海底隧道,故此基地亦新設模擬水深100米嘅深潛模擬器作訓練。展望一兩年內引入混合氣潛水裝備後,潛水組就有能力喺一百米水深嘅地方執勤。

設施[編輯]

消防潛水訓練基地設有多項設施,包括深8米嘅潛水訓練池、最高流速達每秒1.5米嘅急流池、水中焊切缸、及高1.8米嘅巨浪製造器。為配合政府飛行服務隊協力喺海上搜救,基地亦特設模擬直升機下壓風力嘅巨型風扇同埋絞盤吊運裝置等。另外,基地設有全東南亞唯一一座價值過千萬港元嘅深潛模擬器,可模擬水深達百米嘅水壓環境,畀潛水組做訓練。此外,基地設有兩個加壓室,一個作訓練用,另一個就用作醫院管理局對病人作加壓治療,亦可以為器官移植者進行高壓氧治療[20]

  • 急流池,可以製造每秒達0.5至1.5米嘅急流,令受訓人員儼如置身急流之中,進行拯救行動練習。
  • 潛水訓練池,深8米、長25米、闊11米嘅潛水訓練池內設有巨型球體製浪器,能夠上下擺動,製造高達0.8米嘅大浪。
  • 深潛模擬器,可以模擬水深達百米下嘅水壓環境,讓受訓人員能夠適應喺深海壓力環境下出現嘅氮醉情況。
  • 巨形風扇及直升機絞盤,用嚟模擬直升機在海面上救人嘅情況;巨形風扇所製造嘅風速可達每秒10米,相等於UH-60黑鷹直升機嘅下衝氣流。
  • 焊切缸,深4.5米,直徑3米,令受訓人員能夠模擬喺水底下用萬能剪進行爆破,年內亦將會引進水底燒焊訓練[21]

消防處坍塌搜救專隊訓練場[編輯]

消防處坍塌搜救專隊訓練場英文Fire Services Department Traning Ground for Uraban Search & Rescue Team)係消防處坍塌搜救專隊嘅訓練基地,位於香港上水彩順街。訓練場耗資500萬港元建造,2011年9月15號啟用。面積達2,770平方米。坍塌搜救專隊訓練場可以模擬唔同種類嘅建築物受災後嘅環境,可以用作訓練人員喺狹窄、坍塌樓宇、以及密閉場地中使用各種爆破、搜索及拯救等工具,進行城市搜索及拯救[22]

設施[編輯]

坍塌搜救專隊訓練場嘅建造係參考過世界級消防訓練學校嘅專門訓練場館,坍塌搜救專隊訓練場被劃分為13個以不同顏色識別嘅區域,每個區域都有單層或多層嘅建築物,布置咗模擬各類坍塌場景,包括學校、辦公室、工廠、車場以及有坍塌危險嘅混凝土牆等等[23]。區域之間以長約75米嘅迂迴管道連接,形成一個迷宮。管道內外會因應唔同嘅模擬情況,而放置種類數量唔同嘅雜物,用嚟訓練人員喺狹窄環境中前進,同埋穩固隨時倒塌嘅瓦礫嘅能力,同時提升人員喺各種複雜嘅坍塌現場中進行搜索及拯救嘅能力以及效率[24][25][26][27]。此外,坍塌搜救專隊訓練場有一幢高3層嘅樓宇,畀人員練習高角度拯救[28]

參考/註釋[編輯]

  1. 消防處將聘370人強化裝備
  2. 西貢區議會 關於遷建消防處消防訓練學校[失咗效嘅鏈]
  3. 將軍澳建新消防訓練學校 《星島日報》 2012年6月18日
  4. 將軍澳建新消防訓練學校
  5. 34億元建三合一消防校
  6. 重建消防訓練學校暨重置消防駕駛訓練學校
  7. 消防訓練學院
  8. "消防處二零一零年工作回顧". (原先內容喺2011年11月6號歸檔). 喺2012年7月6號搵到. 
  9. 消防擬將軍澳建訓練校
  10. 消防訓練學校重建計劃
  11. 立法會保安事務委員會 消防訓練學校重建計劃
  12. 消防訓練學校
  13. 消防訓練學校
  14. 滅火與救援訓練
  15. "消防處二零零六年工作回顧". (原先內容喺2010年1月9號歸檔). 喺2012年7月6號搵到. 
  16. 政府致力提高救援服務質素
  17. 真火訓練場消防可「實戰」
  18. 消防處救護訓練學校
  19. 消防處救護訓練學校
  20. 消防潛水訓練基地 亞洲最先進
  21. 消防潛水基地 培育泅水銅人
  22. 消防斥資五百萬建坍塌搜救訓練場啟用《商業電台》 2011年9月15日
  23. 消防處於上水設坍塌搜救訓練場今啟用 《東方日報》 2011年9月15日
  24. 坍塌搜救訓練場啟用 《太陽報》 2011年9月16日
  25. "專隊訓練場提升坍塌搜救效率". (原先內容喺2018年9月29號歸檔). 喺2012年7月6號搵到. 
  26. 坍塌搜救訓練場 《星島日報》 2011年9月16日
  27. 消防建坍塌場訓練搜救 《明報》 2011年9月16日
  28. 坍塌搜救訓練添場地 《東方日報》 2011年9月16日