漢波德企鵝

漢波德企鵝

Spheniscus humboldti

漢波德企鵝（學名：Spheniscus humboldti），又叫做洪氏環企鵝，係喺南美洲生活嘅一種企鵝，主要喺秘魯同埋智利沿岸繁殖。漢波德企鵝呢個名，係來自第一個將佢介紹畀西方學界認識嘅德國自然科學家亞歷山大·馮·洪堡。

漢波德企鵝係中型企鵝，成鳥大概65-70厘米高。佢哋個頭係黑色，重有一條白色寬帶由眼後面穿過耳仔一直延伸到下頜附近；有啲背脊重有白色嘅斑點添。

漢波德企鵝係易危物種，主要係由於人捉嗮啲魚，導致唔夠嘢食，族群數量先會下降。依家大概剩番 3,300 到 12,000 隻左右。

趣聞

漢波德企鵝曾經喺北半球被人發現；2002年嘅夏天，阿拉斯加嘅漁民喺阿拉斯加東南沿岸捉到一隻漢波德企鵝，距離佢原本生活嘅地方至少有 11,000 公里遠。由於阿拉斯加冇一間動物園養漢波德企鵝，生物學家覺得企鵝可能原來係智利或者秘魯漁民嘅寵物，喺嗰隻漁船喺阿拉斯加捉魚嗰時走咗。

2012年3月3號傍晚，一隻一歲大嘅漢波德企鵝「337」喺東京葛西臨海水族園走佬，嗰隻企鵝喺無人注意嘅情況底下擒上室外展示設施嘅假山，穿過雙重圍欄中間條隙走佬。逃亡嗰時好多次被啲民眾目擊喺東京灣出沒，但係館方多次嘅圍捕行動都失敗。喺逃亡82日之後，終於喺2012年5月24號被人捉到。