新葡京
 | 呢篇文側重咗喺部分見解、事件或爭議。 |
想搵第二個意思嘅話，請睇葡京 (搞清楚)。| 澳門新葡京酒店 葡稱：Hotel Grande Lisboa 英稱：Grand Lisboa Macau | |
|---|---|
 | |
| 開幕日期 | 2007年2月11號（賭場部分） 2008年12月17號（酒店部分）[1] |
| 所在城市 |  澳門 |
| 所在區域 | 澳門半島 |
| 地址 | 澳門葡京路 |
| 酒店 | |
| 建築主題 | 蓮花外型設計 |
| 酒吧食肆 | 天巢法國餐廳 8餐廳 大廚 當奧豐素1890意式料理 日夜咖啡室內粥麵區 日夜咖啡室 蓮花廊 水晶廊 |
| 娛樂場 | |
| 賭場名稱 | 新葡京娛樂場 |
新葡京酒店（粵拼：san1 pou4 ging1 zau2 dim3；英文：Grand Lisboa Hotel；葡文：Hotel Grande Lisboa），簡稱新葡京。球狀部分叫萬象球，舖滿液晶體顯示屏[2]，蓮花外型設計部分高 260 米，共 58 層；有 431 間客房[3]，號稱以七星級標準設計[4]，政府評之以最高嘅五星豪華級。
新葡京娛樂場（粵拼：san1 pou4 ging1 yu4 lok6 cheung4；英文／葡文：Casino Grand Lisboa），俗稱新葡京賭場，開張時設 240 張賭台同 480 部老虎機。
該項目共秏資四十四億澳門元[5]。
醜聞
[編輯]（股東或／及疊碼仔）黃山（借或／並盜）用金麟貴賓會等賭廳嘅名義，大量集資，到咗2014年4月中旬，連人帶錢失咗蹤（；金額可能係八十億至一百億［香港元或澳門元］；佢着草嘅原因，可能係中共中央打擊貪污政策雷厲風行以及靠山冧檔，搞到資金鏈斷裂）；嗰筆數先前主要擺喺金麟貴賓會入面，（响1976年出世嘅貴州凱里男人）黃山個户口道[6]。黃山走佬嘅消息通咗天之後，有大把同佢無關嘅賭客，拿拿臨由該會攞走自己嘅存款，搞到檔嘢擠提；俾佢掠咗水嘅人，亦紛紛上門追數；金麟貴賓會嘅生意隨之一落千丈。聲稱俾拍檔黃山呃咗十一億（香港元或澳門元），（大約四十歲嘅）穆姓大陸女人，都要求金麟貴賓會向佢還錢；（响1956年喺香港出世嘅男人，）老世何大志話冇得代黃山磅水，不過畀佢帶客人去該會賭錢，從中賺返筆嚟補償……起初講掂咗數。跟住，穆女士發覺噉樣冇乜錢賺……終於响2014年10月5號，佢同埋澳門猛人「細福」，帶住過百個大漢，闖入新葡京娛樂場嘅金麟貴賓會，要求交出（一個叫）「阿昌」（嘅賭客或／及疊碼仔）；嗰班友之中有古惑仔同講普通話嘅大陸東北佬，喺嗰道喊打喊殺，除咗阻止客人賭錢，重要搶走埋職員嘅電話，恐嚇咪報警——否則就跟佢哋返屋企，更喺賭場周圍把守，氣氛緊張。何大志聯絡唔到阿昌，急急腳噉（响同日或翌日）趕到現場……穆女士向佢攤牌——既要攞人，亦要何大志交哂成個金麟貴賓會畀佢揸旗……雙方傾軭咗，之後黑幫多次去晒馬同阻住個架步做生意，不過賭場看更由始至終都䄂手旁觀……後嚟，有兩個司警喺該賭廳外長期駐守，名義上係要防止啲人搞事，實際上整到個架步更加難揾食——無論客人係嚟提款定係賭錢，都會被扚去司法廳盤問。澳門博彩股份有限公司行政總裁蘇樹輝，話畀何大志聽，金麟呢個名已經壞哂，要將金麟貴賓會同金麟娛樂一人有限公司改名，先至有得留低；何大志唔肯，指重有（兩億至五億［香港元或澳門元］嘅）債未收返——個名唔同咗嘅話，債仔就唔會還錢。賭場以賭廳响2014年11月嘅業績唔達標為理由，罰款一千（多）萬（香港元或澳門元），對方唔就範……响同月，新葡京娛樂場入面嘅金麟貴賓會，卒之摺埋咗，場地收返；然而，有異於行內慣例，賭場唔肯將賭廳揸住，面額為一百五十多萬香港元，該博彩公司場內（該）賭廳專用嘅泥碼，用錢收返。雙方反哂面，好快搞到對簿公堂；何大志經營之（七間，其中六間係佢獨資嘅）賭廳，捱唔過呢一連串打擊，統統執哂笠，然而官司繼續打落去[7]。本段消息多數出自記者研究，以及由何大志告知傳媒；澳門博彩股份有限公司唔多願意向新聞界解釋呢壇嘢[8]。
趣聞
[編輯]如同葡京酒店，坊間有唔少所謂新葡京整成咗風水陣嘅分析[9]。
美國有線電視新聞網請咗班建築界代表，响2011年評選出世界上最具代表性嘅二十座摩天大樓，新葡京位列十二[10]。
响2012年，《電訊報》揀出全球二十間最醜怪酒店，新葡京排第十二[11]。
喺《香港澳門米芝蓮指南2016》，天巢法國餐廳及8餐廳獲得三星評分，畀大廚嘅評分為一星[12]；現時三者所得之評分，同當時嘅一樣[13]。日夜咖啡室內粥麵區有賣一根麵，重配埋甩麵表演[14]。
濠博新聞响2021年8月18號引述消息人士報道：有個大陸賭客响2021年8月17號，喺新葡京娛樂場，經老虎機贏咗大約三百萬（香港元或澳門元），不過到佢出示證件領獎時，因被發現逾期逗留，而俾警察扚走咗；由於入境方式合法，賭場係會用支票派彩畀佢嘅[15]。
註解
[編輯]正文用到斜體字嘅多處，皆有消息衝突。
參考
[編輯]- ↑ sjmadmin。〈澳博熱烈慶祝澳門新葡京酒店今日盛大開幕嶄新地標展望澳博之成就與發展〉。www.sjmholdings.com (臺灣中文)。喺2021-07-22搵到。
- ↑ 〈關於新葡京酒店 | 澳門新葡京酒店〉。www.grandlisboahotels.com (繁體中文)。喺2021-07-22搵到。
- ↑ 〈新葡京酒店 - 澳門特別行政區政府旅遊局〉。www.macaotourism.gov.mo (繁體中文)。喺2021-07-22搵到。
- ↑ 〈澳門 入住頂級飯店 賞太陽劇團 ｜ 蘋果新聞網 ｜ 蘋果日報〉。《蘋果新聞網》 (臺灣中文)。2008-09-24。原著喺2021-08-26歸檔。喺2021-07-22搵到。
- ↑ 〈新葡京賭場開幕 湧6萬人 ｜ 蘋果新聞網 ｜ 蘋果日報〉。《蘋果新聞網》 (臺灣中文)。2007-02-11。原著喺2021-08-26歸檔。喺2021-07-22搵到。
- ↑ 〈"不正常"的澳门赌场贵宾厅 | 南方周末〉。www.infzm.com。喺2022-08-08搵到。
- ↑ 〈澳門賭業大變奏〉。theinitium.com (中文)。喺2021-08-14搵到。
- ↑ 〈存档副本〉。theinitium.com。原著喺2021-02-16歸檔。喺2021-08-14搵到。
- ↑ 〈【賭王逝世】舊葡京風水陣威足40年 回歸後澳博由龍頭慘變龍尾 ｜ 蘋果日報〉。《Apple Daily 蘋果日報》 (香港中文)。原著喺2021-06-21歸檔。喺2021-06-21搵到。
- ↑ 〈全球20地標大樓 新葡京入選 - 香港文匯報〉。paper.wenweipo.com。喺2021-07-22搵到。
- ↑ 〈全球最醜20家飯店 各有特色 ｜ 蘋果新聞網 ｜ 蘋果日報〉。《蘋果新聞網》 (臺灣中文)。2012-11-13。原著喺2021-08-26歸檔。喺2021-07-22搵到。
- ↑ 〈米其林推澳門街頭小吃 台灣胡椒餅上榜 ｜ 蘋果新聞網 ｜ 蘋果日報〉。《蘋果新聞網》 (臺灣中文)。2015-11-05。原著喺2021-08-26歸檔。喺2021-07-22搵到。
- ↑ "Page 3 - Macau MICHELIN Restaurants - the MICHELIN Guide 澳門". MICHELIN Guide (繁體中文). 喺2021-07-22搵到.
- ↑ 〈【歌舞片】旋轉跳躍 這碗麵 華麗得嫑嫑的 ｜ 蘋果新聞網 ｜ 蘋果日報〉。《蘋果新聞網》 (臺灣中文)。2017-02-25。原著喺2021-08-26歸檔。喺2021-07-22搵到。
- ↑ Newsdesk (2021-08-18)。〈內地客新葡京玩角子機贏300萬 被揭逾期逗留幸仍獲派彩〉。Allin News (繁體中文)。喺2021-08-18搵到。