澳門海事博物館
 | |
 海事博物館展覽大樓 | |
  海事博物館位置圖 | |
| 成立日期 | 1987年11月7號 1990年6月24號（遷址） |
|---|---|
| 地址 |  澳門媽閣廟前地1號[1][2] |
| 經緯度 | 22°11′10″N 113°31′50″E / 22.18603°N 113.5306°E |
| 類型 | 海事、航海 |
| 網站 | http://www.museumaritimo.gov.mo |
海事博物館（粵拼：hoi2 si6 bok3 mat6 gun2，Museu Marítimo）係一所座喺澳門風順堂區媽閣廟前地1號以海事同航海為主題嘅博物館。澳門曾經喺1919年設立海事及漁業博物館，但係喺第二次世界大戰嗰陣時因為被空襲而閂館；當局喺1987年11月7號喺媽閣廟前地嘅一座葡萄牙特色建築物設立海事博物館，直至到1990年6月24號遷至現址。
歷史
[編輯]1986年，當時海事署(即係依家嘅海事及水務局)署長蘇勵治海軍中校提出建立海事博物館，選擇咗喺媽閣廟前地一棟古老嘅建築物作為展覽大樓。展覽大樓嘅正面建築係依照船形狀嚟設計，座落喺河口側近，喺供奉漁民嘅女保護神（媽祖）媽閣廟側近。
|
開放時間
[編輯]- 上晝10點至下晝6點 (下午5點半停止入場)
- 逢星期二休館
入場飛
[編輯]- 星期一至六
- 10歲至17歲 Mop5
- 18 歲至 64 歲 Mop10
- 星期日
- 10歲至17歲 Mop3
- 18歲至64歲 mop5
10歲留下細路、65歲或以上老人家、持澳門居民身份證人士、持有效國際博物館協會會員證、本地或者國際老師證、記者證人士免費入場。
持有效本地全日制學生證或者國際學生證人士，標準入場飛（10蚊票）七折優惠，即係每張Mop7蚊。
設施
[編輯]依家海事博物館嘅展覽大樓有3層，好似一隻已揚帆嘅三桅帆船[3]，面積為800平方米[4]，主要由展覽館、圖書館同露天茶座三個部分所組成。
展覽館
[編輯]展覽館由海事民俗展覽廳、海事歷史展覽廳、海事技術展覽廳同水族館4個展區所組成：
- 海事民俗展覽廳（葡文：Exposição de Etnologia Marítima）展出海上航海學校嘅薩格雷斯號（SAGRES）嘅模型、10隻葡萄牙傳統漁船模型、一隻由鯨魚嘅骨而制成嘅龍舟模型、澳門以及南中國地區嘅漁民傳統同藝術、船隻、服飾以及同漁民民俗相關嘅節日描述等展品[5]；
- 海事歷史展覽廳（葡文：Exposição de História Marítima）主要展示葡萄牙同中國喺15世紀至17世紀嘅海事歷史，展品包括葡萄牙航海家喺航海時代曾經使用嘅卡拉維拉船同商船模型、輔助航海器具、17世紀嘅澳門地理立體模型等展品[5]；
- 海事技術展覽廳（葡文：Exposição de Tecnologia Marítima）展出同航海技術相關嘅展品，例如中國沿海第一座燈塔——東望洋燈塔模型、八分象限儀、六分象限儀、望遠鏡、羅盤等展品[5]；
- 水族館（葡文：Galeria dos Aquários）展出河流嘅河床、海港、珊瑚礁同埋深海合共4個唔同水底嘅環境[5]。
圖書館
[編輯]圖書館館藏大約有2,500本有關海事技術、海事民俗學、葡萄牙同中國嘅海事歷史、澳門歷史等類別嘅相關書籍。另外，亦有一個相片檔案庫，藏有有關海事資料同澳門近代歷史等相關圖片[6]。
露天茶座
[編輯]露天茶座喺海事博物館以北一個露天地方，佢面積同一個籃球場一樣，可以遠望至對岸嘅中國大陸珠海市香洲區灣仔[7]。
參考
[編輯]- ↑ 何惠 (2001)。《澳門‧博物館導遊手冊》。澳門：澳門文化局、澳門博物館。ISBN 9789993701262。
- ↑ 引用錯誤 無效嘅
<ref>標籤；無文字提供畀叫做info嘅參照 - ↑ 〈海事博物館〉 (繁體中文)。Ggogo吉帝旅遊。喺2012年3月22號搵到。
- ↑ 引用錯誤 無效嘅
<ref>標籤；無文字提供畀叫做FM嘅參照 - ↑ 5.0 5.1 5.2 5.3 〈展覽廳〉 (繁體中文)。海事博物館。原著喺2011年12月21日歸檔。喺2012年3月22號搵到。
- ↑ 〈圖書館〉 (繁體中文)。海事博物館。原著喺2012年1月10日歸檔。喺2012年3月22號搵到。
- ↑ 〈海事博物館露天茶座重開〉 (繁體中文)。開心澳門。原著喺2012年1月24號歸檔。喺2012-03-26搵到。
