瀝源

  提示：呢篇文講嘅唔係小瀝源。

  想搵第二個意思嘅話，請睇瀝源 (搞清楚)。

瀝源（粵拼：lik1 jyun4）係香港新界一個地方，係沙田古稱。沙田有條公共屋邨——瀝源邨。而家瀝源一般都係講緊呢條邨。

歷史

瀝源即係瀝源大村，古代又叫做「瀝源堡」或者「瀝源洞」，盛產香木。清朝初年一度淪為盜賊藏身之所。1898年，英國人佔領新界，據講英國人唔熟地頭，去到瀝源入便嘅沙田村，想問當地人嗰區叫咩名。點知因為言語不通，村民唔知啲鬼佬問緊嘅係嗰區嘅名，以為問緊條村名，就答啲鬼佬：呢度係沙田。從此沙田就由一條鄉村嘅名變咗做一個區嘅名。1970年代，香港政府響沙田區建設「新市鎮」，區入便最早起（1976年落成）嘅公共屋邨就係用「瀝源邨」嚟命名。瀝源對出個海叫瀝源海。