玉虛宮
灣仔北帝廟，又叫灣仔北帝古廟或者灣仔玉虛宮，係香港港島灣仔隆安街嘅一間北帝廟，由華人廟宇委員會負責打理。第二次世界大戰之前，係灣仔北帝廟嘅全盛時期，到咗每年嘅農曆三月初三「北帝誕」，街坊演劇賀誕，墟冚到不得了。
灣仔北帝廟被古物諮詢委員會評定為「一級歷史建築」，原本叫玉虛宮。喺清朝同治二年（1863年）起，屬三進三間式建築物，基本設計屬於四合院形式，廟嘅正脊飾有雙龍，係由嗰時啲灣仔街坊夾錢起嘅。灣仔北帝廟有過多次大小重修，廟裏面有碑誌說明中華民國十七年（1928年）曾經重修。喺2005年，香港政府嘅華人廟宇委員會都為灣仔北帝廟用過千萬港元進行大修。
