無罪假定

  「無罪假設」跳轉到呢度。想搵差唔多名嘅香港ViuTV劇集，請睇「假設性無罪」。

無罪假定係現代法律嘅一個重要原則。呢個原則係指當一個人未畀法庭判有罪之前，要先假定佢係無罪。

無罪假定係現代法治國家刑事司法通行嘅一項重要原則，係國際公約確認用嚟保護基本人權，亦係聯合國喺刑事司法領域制定同推行嘅最低限度標準之一。假如原告拎唔出足夠合理證據，被告就冇罪喇。

香港

香港以前係英國屬地，繼承咗英國普通法嘅傳統，用無罪假定嚟對待疑犯，即係係疑犯未經審判定罪之前都必須假定為無罪。呢個原則貫穿香港刑事訴訟程序嘅每一個步驟。英國上議院議員約翰·紳奇勳爵形容呢個原則係「貫穿英國刑事法嘅金線」。雖然係咁，危險藥物條例下嘅所有罪行同非禮罪仍然係屬於有罪假定，例如，香港法例第134章危險藥物條例講明，任何被指控觸犯呢條法例嘅人士都必須承擔一切舉證責任。

除咗咁，無罪假定亦要求控方所提出嘅所有證據都要達到毫無合理疑點(beyond reasonable doubt)先可以將被告定罪；如果唔係，係疑點利益（benefit of doubt）歸於被告嘅原則下（另一由無罪假定延申出來嘅原則），被告會被判無罪。

香港根據加拿大最高法院係1986年嘅R. v. Oakes案例，奠定咗無罪推定嘅重要性。除咗透過案例嚟保障無罪推定，香港亦透過成文法(statute)嚟更加明確清晰咁確保呢個原則同埋延申權利獲得認可同保障。

• 《香港人權法案條例》第十一(一)條確認「無罪假定原則」

「

受刑事控告之人，未經依法確定有罪以前，應假定其無罪。

」

• 《香港人權法案條例》第十一(二)(庚)條保障不自我指控權及緘默權

「

不得強迫被告自供或認罪。

」