狐狸先生幾多點

狐狸先生幾多點

玩家數量	3人或以上
準備時間	少過1分鐘
複雜程度	低
策略成分	需要
遊戲時間	無時間限制
運氣成分	低至中
要嘅技巧	跑步、策略、耐力、時間管理、膽量、堅持

狐獵食，遊戲主題。

狐狸先生幾多點，隻遊戲來自英國，香港細路仔有玩，唔單止香港，世界大把地方都有玩。按分類，叫集體遊戲，大班人一齊玩咁。大班做畀人捉，要諗計唔好畀「狐狸先生」捉到，而「狐狸先生」就要去捉住其他人。香港有時見女仔做狐狸就改叫「小姐」。想像狐狸獵食，想像狐狸奸狡，再加埋時鐘元素，就成為呢個遊戲。

英國倫敦一八九九年有本書，叫童謠史。裏面有節叫「請問，狐先生，今下時間若何？」，亦即「狐狸先生幾多點」差唔多。玩法都有啲似，但有啲唔同。

本來狐狸先生企喺中心高處，其餘就手拖手，行近佢。其他人問時間，而狐狸答個時間，要有啲狡猾先得，咁先捉到人。狐狸要狡猾，呢個符合英國傳統對狐狸睇法。正如伊索寓言咁，狐狸同烏鴉個故仔，狐狸𠱁烏鴉放開塊肉咁狡猾法。狐狸喺英國好常見，市區都見得到。

英國後尾有啲轉變，狐狸換成狼，變咗鐘夠食獵物，好似嗌「晚餐時間」咁，嚇人做主題。好多人仍然叫狐狸先生，亦有啲人叫狼先生。北美洲有啲地方甚至變咗叫鯊魚先生。

遊戲畀細蚊熟念時鐘，亦要專注人哋所講時間，好多時要走得快。一方要揀啱步幅以免畀人捉，另一方要嗌啱時間，諗時機捉人。

文

狐狸先生幾多點（粵拼：wu4 lei2 sin1 saang1 gei2 do1 dim2) 。

英文叫法好多

1. Mr. Fox, what time is it?
2. What time is it, Mr. Fox?
3. What is the time, Mr. Fox?
4. What's the time, Mr. Fox?

可以替換成Wolf，狼，Shark，鯊，諸如此類。

玩法

一八九九年

童謠史原本咁寫：

有個細蚊仔位喺山仔上，或者稍稍高啲地方。成班細蚊，手拖住手，稱呼佢做狐生，兼問⋯⋯

「請問狐生幾點鐘。」

狐生答「一點鐘」。

佢哋好安全，返竇。

佢哋又問多次再試膽。

狐生大嗌「十二點鐘」，同時追住佢哋，搞到佢哋四散。嗰啲返唔切竇，就做咗階下囚。一直咁玩，玩到剩低一人，想當然，佢就做下位狐生。

個問題「請問狐生幾點鐘」。而答「十二點鐘」，呢個要留意，夠晒奸狡，狐味十足。

答「一」、「二」、「三」、「四」等等，搞到難以捉模咁。

一九一七年

美國紀錄咗另一種玩法，用來做體育，叫半夜十二點鐘，咁寫法：

一角劃做狐竇，一角劃做雞棲。一人做狐生，一人做雞乸，其他做雞仔。雞乸安排啲雞仔緊緊一團，帶佢哋埋去狐竇，就問「就你歡喜，狐生幾點鐘」。除咗半夜，答幾點鐘佢哋都安全，可以去玩。雞乸畀佢哋玩一陣，又再排過，企喺佢哋同狐中間，又問時間多次。狐生一答「半夜十二點鐘」，佢哋就要衝返雞棲，而狐生就要試掂人捉一隻。狐生揀下隻狐生，雞乸揀下隻雞乸，之後就再玩過。

一九七七年

澳洲出過本書，狐變咗做狼，書題做「乜嘢時間，狼先生」，裏面講述玩法。

香港

香港流行玩法，地方有牆，同有條起步綫，同牆平行。地方唔定可以咁啱咁，之不過變通就得。

首先揀個人做狐狸先生，方法隨意，何嗎又好，包剪揼都好。狐狸先生企喺牆邊，其他人企喺起步綫。

跟住，成班大聲問狐狸先生，「狐狸先生幾多點」。狐狸先生噏幾點都得，限喺一到十二，好似一點、兩點咁。

一到十一之間，成班人以點鐘數當步數，行咁多步。大步細步隨自己定。若果步數去到牆都未完，就可反彈方向，行夠即可。停定之後，成班人再問一次。

狐狸先生一講「十二點」時，成班人可衝返起步綫，咁就安全。狐狸先生同時衝過去，搵個人掂下捉人。捉到個人就做狐狸先生。

狐狸先生捉唔到人，就要返去牆，重新玩過。

有啲要狐狸先生向住牆，等佢嗌十二點鐘之前，唔知大家企個位。

若果女仔做狐狸，就改叫狐狸小姐。

其他

有啲地方唔一定嗌十二點捉人，而改嗌食晏食晚餐時間，又或者半夜。