猶太教莉亞堂
22°16′54″N 114°08′56″E / 22.281611°N 114.148915°E
猶太教莉亞堂（Ohel Leah Synagogue，又叫猶太廟），係香港一間猶太教教堂，喺香港島半山區羅便臣道近衛城道交界，喺1990年被評為香港一級歷史建築，2009年12月18號確定評級。
史
[編輯]猶太教莉亞堂1901年開始起，1902年起好，由當時香港銀行家沙宣爵士所起，為紀念佢阿媽莉亞女士，因此改名叫莉亞堂。
猶太教莉亞堂曾經喺1998年自資4,000幾萬港元重修，外牆批盪由原來嘅白色改為黃色，將後期嘅添加物拆咗，將地磚、梯級同門窗回復原貌，之後喺2000年得到聯合國教科文組織亞太區文物古蹟保護獎優異項目獎。
建築
[編輯]猶太教莉亞堂樓高兩層，成座樓主要由外墻10條石柱支撐，採取古典主義嘅比例同對稱，結合中世紀西班牙同東猶太嘅建築風格設計，左右有八角形塔樓，中軸對稱。莉亞堂正中央係祭台嘅位置，比地面升高五級樓級，祭台面向會堂盡頭係藏經庫，佢裏面安放咗手抄《摩西五經》嘅銀筒。祭台兩邊木椅畀年長信徒使用，前廳左右塔樓裏面有木樓梯可以通往由飛扶壁支撐嘅露台，從露台可以望到中間嘅祭台，畀婦女喺舉行宗教活動嘅時候用。