玩扮嘢

玩扮嘢（pretend play / make believe）係玩嘅一種，指涉及「扮到好似某件物體或者某個人係第樣嘢噉」嘅玩，例如一間用積木砌出嚟嘅屋並唔係一間真嘅屋，但個細路喺玩嗰陣扮到好似間積木屋係間真屋噉；又或者係玩煮飯仔，班細路扮到好似自己係一個家庭嘅成員噉，但佢哋未必真係同一個家庭嘅成員。喺年紀大少少嘅細路當中，玩扮嘢可以複雜到涉及一大班個體進行表演戲劇等嘅活動。

喺玩扮嘢嘅過程裏面，細路要展現想像力（明明物體 A 同物體 B 係兩樣嘢，但將 A 想像成 B）同埋留意唔同事物之間嘅抽象相似性（一間積木屋唔係一間真屋，但兩者都有屋頂同牆等嘅特徵）。因為噉，玩扮嘢俾人指對於認知發育嚟講好重要，而且透過對「邊個扮乜角色」等嘅談判過程（例：「我想喺套話劇入面扮演主角」）仲會涉及同人相處嘅技能^[1]^[2]。