畔溪酒家

  提示：呢篇文講嘅唔係泮溪酒家。

畔溪酒家（英文：Riverside Seafood Restaurant），又叫畔溪海鮮酒家，而家叫畔溪尚粵館（英文：Riverside Restaurant），係香港嘅一間酒樓。佢曾經喺九龍九龍塘聯合道322號1樓，喺1981年開張，已經喺2010年12月底執笠，原因係嗰度座大廈清拆重建，納入香港浸信會醫院範圍。之後佢喺2011年喺將軍澳坑口東港城再開過，改名「畔溪尚粵館」，經營至而家。

舊畔溪酒家鄰近香港電視台同電台嘅集中地廣播道，所以吸引好多附近做嘢嘅藝人幫襯，被譽為「明星食堂」，出名宴會包括周潤發同余安安嘅婚宴、萬梓良劇集收視高嘅慶功宴、張國榮宴客同埋梅艷芳幫阿媽擺大壽。

另外，畔溪酒家亦曾經係聯合道嘅其中一個地標，嗰時搭小巴去浸會醫院同浸會大學喺嗰度落車，都要嗌聲「畔溪有落！」通知司機停站。

除咗九龍塘總店之外，畔溪酒家1990年代亦曾經喺沙田富豪花園同紅磡黃埔花園開分店，更有賣電視廣告宣傳任食火鍋。