石庫門

 石庫門（粵拼：sek6 fu3 mun4） （上海話：zaq⁸ khu¹ men⁶，發音：[zᴀʔ¹¹ kʰu¹¹ mən²⁴]）係一種上海混合西方同吳越特色嘅建築風格，亦都係以前上海人居住嘅主要形式。呢種樓最早喺 1860 年代出現，最興嗰陣，上海一共有九千幢石庫門形式嘅樓。而家，大部分上海人轉咗去住公寓，所以石庫門數量變得少咗。

結構

石庫門主要係兩至三層高，樣好似西洋排屋嘅樓，外面用磚造成，裏面有江淮式庭院。呢啲樓平時見到會一個一個排埋一齊，兩排之間形成嘅街道就叫「 弄堂（粵拼：lung6 tong4） 」（上海話：lon⁶ daon⁶，發音：[loŋ¹¹ dɑ̃²⁴]）。呢啲弄堂嘅入口大部分都會起個牌樓。

石庫門主要可以分兩種：1919 年前起嘅「舊式」同 1919 年之後嘅「新式」。

歷史

呢種樓原本係上海人嘗試混合西洋排屋嘅特徵入原有嘅屋宇。一八四三年，上海變咗個商埠，因此吸引咗好多其他省份嘅工人去上海打工。一八五三年太平天國之亂完咗之後，更多人打算移民到去上海。突然間要多咁多間屋，啲新樓爲咗慳錢，全部都用木起，而樓名後面全部加咗個「里」字。呢啲就係上海最先嘅 里弄（粵拼：lei5 lung6） ，十個月以內起咗八百幢。由於呢啲木樓好容易着火，啲木慢慢演變到去磚，模擬江南嘅四合院。

雖然起新嘅石庫門冇以前啲木樓咁平，佢哋都冇傳統嘅庭院住院咁大。呢啲新石庫門最早係喺上海英租界裡面起嘅，但係喺華人區裡面變得好興，而且喺呢個時代裡面變咗上海最普遍嘅住宅。1910 年代，石庫門爲咗社會變化，加咗好多唔同嘅變遷，例如汽車車道、闊啲嘅弄堂，同埋古羅馬型式嘅裝飾。到咗三十年代嗰陣，石庫門嘅數量開始下降。