精神病

出自維基百科,自由嘅百科全書
(由神經病跳轉過來)
跳去: 定向搵嘢
精神病
分類同外部資源
Gautier - Salpetriere.JPG
19世紀亞芒·戈池嘅畫,畫中有8個得咗精神病嘅女人。
ICD-10 F99
醫學主題詞 D001523

精神病粵拼zing1 san4 beng6),又叫精神疾病zing1 san4 zat6 beng6精神障礙zing1 san4 zoeng3 ngoi6精神紊亂zing1 san4 man6 lyun6(紊讀問)[註 1],係種有特定癥狀去影響心理同日常行為嘅,呢啲癥狀構成行爲上嘅功能性障礙,而同行爲嘅社會規範無關。根據病徵大體上分爲思覺失調神經症兩類。而根據程度分爲精神異常精神錯亂

根據世界衛生組織,精神病會有症狀同痛苦所導致嘅功能性不全[1];而據美國精神醫學學會,精神病會有顯著嘅痛苦以及功能性障礙[2]。「精神病」係習慣講法,對應嘅英文係mental disease[1],嚴格嘅正式用語叫「精神障礙」或者「精神紊亂」,對應嘅英文係mental disorder[1][3]。一般各種精神病嘅名叫做「症」或者「障礙」。而確診得咗精神病嘅人稱爲精神病人、精神病患、精神病患者。

精神病有生理因素同心理因素。生理因素同神經系統有關,尤其係部神經嘅異常,呢方面有時有些少遺傳因素;心理因素比較複雜多樣,比如外界好強嘅刺激等。

分類[編輯]

根據病徵有無影響心智來睇,分成思覺失調同神經症兩大類。

而根據IC-10嘅分類,精神病分爲11種類型,有器質性精神障礙、精神藥物引起嘅精神障礙(比如藥物依賴之類嘅物質關聯障礙)、精神分裂症、情感性精神障礙(比如抑鬱症同躁鬱症)、神經症及應激相關同埋身體形式嘅障礙(比如恐慌症焦慮症)、生理紊亂及同軀體有關嘅行爲障礙(比如性功能障礙)、成人人格及行爲障礙、精神發育遲滯、心理發育障礙、起病於幼年嘅行爲及情緒障礙、未定類型。

污名化及迫害[編輯]

精神病同其他嘅病一樣,都令患者好痛苦,但由於精神病會影響心智同行爲,令到社會隔離精神病人,歧視、侮辱佢哋,污名化咗精神病,甚至迫害精神病人。比如納粹曾經屠殺精神病患。

根據法國哲學家福柯嘅名作《癲狂與文明中文癲狂與文明》,癲人曾經畀社會接納過,後來理性主義上升,社會唔再接納癲人,因爲癲狂視爲非理性,成爲理性主義鎮壓嘅對象,自此產生對精神病患嘅分隔、攻擊、污辱,於是產生癲狂院呢種機構,呢種機構同一般病院唔同。照常講,病人有權決定要唔要治療,喺醫院出入自如。但癲狂院當中,精神病患韞住曬,甚至強迫接受治療,病人無得話事。噉樣癲狂院與其話係醫療機構,不如話更似監倉。福柯認爲,癲狂院其實係社會鎮壓精神病患嘅暴力機構。

而喺法律上,精神病患定做無行爲能力嘅人,有監護宣告,所以喺法律上精神病患唔可以處理自己嘅財產,必須由監護人出面。

因爲社會對精神病嘅污名化,精神病成爲受政治攻擊嘅標籤,只要貼呢個標籤,就可以順理成章迫害、鎮壓唔畀社會接納嘅個人。因此精神病患嘅人權問題好突出。同時精神病嘅治療亦涉及到醫療倫理問題。

對精神病嘅污名化亦見於啲鬧人嘅話,比如「發神經」、「黐線」(或者寫做「痴線」)、「神經病」等等。

[編輯]

  1. 個名當中嘅「精神」可以換成「心理」組詞。

[編輯]

  1. 1.0 1.1 1.2 世界衛生組織. The ICD-10 Classification of Mental and Behavioural Disorders : Clinical descriptions and diagnostic guidelines (blue book)(精神、行爲紊亂嘅ICD-10分類:臨床描述及診斷指引藍皮書) (pdf). 世界衛生組織. 1992年. 
  2. 美國精神醫學學會(American Psychiatric Association). Diagnostic and Statistical Manual of Mental Disorders, Fourth Edition, Text Revision (DSM-IV-TR)(精神紊亂診斷及統計手冊,第四修訂版,DSM-IV-TR). 2000年. ISBN 978-0890420256. 
  3. 美國精神醫學學會. Diagnostic and Statistical Manual of Mental Disorders, Fourth Edition (DSM-IV)(精神紊亂診斷及統計手冊,第四修訂版,DSM-IV). 1994年. ISBN 978-0890420614.