神魔之塔
| 神魔之塔 Tower of Saviors | |
|---|---|
 | |
| 類型 | 三消類、RPG |
| 平台 | iOS、Android |
| 整 | Mad Head Limited |
| 發行日期 | 2013年1月28號 |
| 分級 |  |
《神魔之塔》（英文：Tower of Saviors）係一款喺iOS系統同Android系統行嘅轉珠遊戲。玩家要喺泰倫斯大陸中嘅民主國家萊卡瑟王國中冒險。玩家可透過七輪會總部以諾塔去探索主線劇情並於古神遺跡同競技場參與限時嘅活動同合作活動。
遊戲亦包括各種嘅合作、全新嘅活動。每週亦會設有不同既關卡活動。另外可透過主線、副線同昇華故事，展開故事嘅發展。
2014年頭，《神魔之塔》開發商Magic Feature Inc.（Madhead嘅控股公司）嘅21%股權以7,000萬美元（約5.42億港元）賣出。呢次交易令神魔之塔估值高達26億港元。
主線 - 以諾時代
[編輯]萬物起源阿撒托斯同道羅斯喺宇宙中破壞同創造眾多生物而建立嘅泰倫斯大陸。後來，佢哋因不明原因消失，遺留「姆姆」嘅力量。
機械族領袖「龐貝」希望凝聚各物種、守護姆姆，創建和諧嘅世界。但係，嚟自元素所誕生名為「歸者」嘅種族出現，佢哋發現「姆姆」同自身起源息息相關，所以歸者夏馬西嚟到泰倫斯大陸，要求龐貝交出姆姆，但結果被拒絕。
為咗奪回「姆姆」，歸者對機械族發起戰爭，挑撥大陸族群間嘅爭執。大肆屠殺泰倫斯大陸物種。並以自身為藍本製造出劣化版嘅生命體—「代偶」。代偶忠誠咁為歸者服務，作為戰爭機器而存在。
紋龍蒼璧聽到消息之後，決定要保護各族，進入歸者領地，拯救被歸者捉咗嘅各族成員。佢聯同代偶一行，喺創造代偶嘅歸者口中知道咗所有代偶都被植入激發恐懼嘅術式，受到歸者嘅支配。
當中一名叫「依貝思」嘅代偶引起咗歸者「因其都」嘅注意。兩人互生情愫，依貝思有咗因其都嘅細路。依貝思因懷孕一事，俾恩莉兒捉住公開處刑。蒼璧一行費盡方法，總算救出依貝思，但所有反抗歸者嘅代偶亦失去咗自由，受困於歸者領地之中。事件中因其都出手為蒼璧同依貝思解圍。身為歸者嘅因其都為歸者所作嘅惡感罪疚，決定幫蒼璧反抗歸者，以終結遙古大戰。
後來歸者散落於各地、以神農為首嘅歸者創建咗封神仙境、一部份成為咗守護者、並興建以諾塔守護元素力量。令日後泰倫斯大陸得到繁盛嘅發展。
而依貝思有咗嘅細路，後來被龍卵所封印嘅前召喚師以諾，將對世界作出重要影響……
合作與代言活動
[編輯]- 陳妍希 ( 代言 )
- B. Duck
- 迪士尼反派
- Bigbang ( 代言 )
- 軒轅劍
- 仙劍奇俠傳
- 怪物彈珠
- 列王的紛爭
- 大富翁
- Crash fever
- 霹靂布袋戲
- 格鬥天王
- 全職獵人
- 幽遊白書
- 為美好的世界獻上祝福
- Android
- Fairy tail
- 聖鬥士星矢 ( 黃金十二宮篇 及 冥界篇 )
- Ultraman
- 初音未來
- 肯德基
- 舒跑
- 鋼之鍊金術師
- 雪碧
- 天元突破
- 七大罪
- 新世紀福音戰士
- Rockman X Dive
- 鬼滅之刃
- 天竺鼠車車
- 哥斯拉
- 幪面超人
- 我的英雄學院
- 銀魂
- 數碼暴龍
- 一拳超人
- Spy Family
- 美少女戰士
抄襲爭議
[編輯]《神魔之塔》嘅戰鬥介面、屬性設計、轉珠介面、傷害計算公式、剋制屬性曾經係極度相似。亦同樣有好友隊長制度、友情點數、抽蛋制度。而召喚獸嘅動作設計同《龍族拼圖》召喚獸嘅動作結構好似，因此被指出同《Puzzle & Dragons》有好多相同嘅地方，俾網民嘲笑做「神抄之塔」。製作人曾建中透過媒體否認指控，指出佢哋喺製作遊戲時參考咗唔少遊戲，並講到新嘅諗法通常係基於舊有嘅想法而出嚟[1][2][3]。雖然《Puzzle & Dragons》創辦者山本話唔會追究，但雙方支持者仍有好多爭拗。但喺 2021年嶄新時代後，大部分設計已經同 1.0 最初嘅版本有較大嘅分別，包括遊戲介面同抽蛋制度等。
參考
[編輯]- ↑ 〈80後開發《神魔之塔》 否認抄襲 戶口$9.96變7位數〉。蘋果日報。原著喺2014-08-25歸檔。喺2013-07-23搵到。
- ↑ 〈【短片】【動漫節煞科】近50人圍噓《神魔之塔》高呼「香港之恥」〉。蘋果日報。原著喺2013-10-10歸檔。喺2013-07-30搵到。
- ↑ 〈評神魔被指抄襲 莫乃光：改頭換面都要花心機〉。熱血時報。喺2013-07-26搵到。