福佳始終有你
《福佳始終有你》係首歌，響互聯網上流傳，改編自香港特別行政區成立十周年紀念主題曲《始終有你》。演唱者模仿原作嘅唱腔，歌詞帶出香港主權移交以來嘅紛爭。首歌響5月27號（香港時間）上傳到YouTube，兩個禮拜半有超過48萬人次睇過[1]，亦曾引起香港傳媒關注。
歌詞同片段涉及嘅事，包括維港巨星匯風波、董建華做行政長官時嘅政策，好似八萬五起樓計劃、香港普選、拆天星碼頭、六七暴動策劃人楊光受勳、程翔事件，重有民建聯主席馬力喺2007年5月對六四事件嘅評論[2]。
歌詞由香港博客林忌寫，由網民各自唱一段，收齊晒之後，再揀效果最好嗰幾段夾埋成首歌，成個過程都係網上做，合唱嘅人無過見面[3]。影像版由RebuildHK嘅網主Freeman幫手剪輯，音樂版由「神秘人一號」整[4]。
背景
[編輯]2007年，香港政府安排咗好幾個歌手唱《始終有你》，講香港人奮鬥歷程同回歸中國嘅心情，嚟慶祝過渡10週年。2007年5月，香港立法會議員馬力反對香港中學先生叫六四事件做「屠城」，又質疑坦克可唔可以壓學生成肉餅，報章引述馬力話：「搵隻豬嚟測試下就知道會唔會變成『肉餅』。」言論響香港迴響，民主派鬧佢，民建聯亦批評佢失言[5]。
趁住香港回歸近10週年同六四事件18週年，香港博客林忌改咗《始終有你》嘅歌詞，來批評特區政府施政同埋嘅馬力言論。首歌上傳咗去YouTube之後，《蘋果日報》、《明報》、《信報》、《經濟日報》、香港電台同埋有線電視都報道過。
片段
[編輯]隻歌嘅影象版本除咗有講天星碼頭事件同2007年馬力嘅六四言論，重有香港回歸10年嚟觸目嘅事同人，有SARS、董趙洪娉、七一遊行、六七暴動有份嘅楊光受勳等。人物畫面包括鄔維庸、何鴻燊、曾憲梓同埋林瑞麟呢啲所謂「保皇」嘅人[6]。
反應
[編輯]自影像版本喺2007年5月27號上傳至YouTube後，到6月14號為止睇過嘅人超過47萬[7]。跟住有好多媒體包括《蘋果日報》、香港電台節目《晨光第一線》[8]、《頭條新聞》[9]、《講東講西》[10]、《e個世界》[11]、《LTV Café》[12]，重有香港有線電視嘅《香港刺針》都響節目裏面講呢首歌。六月四號喺商業二台時事節目《在晴朗的一天出發》、信報城市筆記《福佳三次方》、信報《互聯網力量不可擋》、明報副刊自由談有讀者投稿[13]。都有關於呢隻歌嘅嘢。
歌曲上傳咗去Youtube之後一日，有網友喺中文維基百科為呢首歌開咗篇文，但有管理員質疑歌曲重要性唔夠而提出刪除，引起刪文嘅政治動機猜測，曾經引起爭議。《蘋果日報》報道過，重叫支持刪除嘅人做「保皇主義者」[14]。而家因主題知名度足夠，留住篇文，事件平息。
而喺2007年6月29號，美國《華盛頓郵報》集團屬下嘅政論雜誌《Slate》，特別以大篇幅介紹呢首歌，藉此反映香港人對馬力嘅言論，以及對北京嘅不滿[15]。
仆街諧音？
[編輯]歌名入面嘅「福佳」，聽落好似「仆街」，所以有人當《福佳始終有你》做「仆街始終有你」。不過，作者林忌響佢自己個博客話，福佳只係「福」同「佳」咁解；又話「馬力」係功率單位馬力，而唔係香港立法會議員馬力[16]。
另外，因為「佳」字字形似「娃」字，所以曾經有人以為首歌嘅歌名係同北京奧運吉祥物「福娃」有關嘅《福娃始終有你》。
參考
[編輯]- ↑ Youtube《福佳始終有你》2007年6月14號
- ↑ 怨氣版回歸歌 馬力、老董做主角 互聯網檔案館嘅歸檔，歸檔日期2007年5月31號，.，《蘋果日報》，2007年5月28號
- ↑ my radio節目訪問歌曲作者Freeman
- ↑ 林忌註
- ↑ 馬力冷血 否定六四坦克壓人變肉餅 互聯網檔案館嘅歸檔，歸檔日期2007年6月4號，.，《蘋果日報》，2007年5月16號
- ↑ YouTube影片畫面
- ↑ 根據Youtube瀏覽紀錄
- ↑ 〈香港電台：《晨光第一線》〉。原著喺2008年6月17號歸檔。喺2007年6月9號搵到。
- ↑ 〈香港電台：《頭條新聞》〉。原著喺2008年6月4號歸檔。喺2007年6月9號搵到。
- ↑ 〈香港電台：《講東講西》〉。原著喺2008年7月3號歸檔。喺2007年6月9號搵到。
- ↑ 〈香港電台：《e個世界》〉。原著喺2007年10月15號歸檔。喺2007年6月9號搵到。
- ↑ 〈香港電台：《LTV Café》〉。原著喺2008年6月4號歸檔。喺2007年6月9號搵到。
- ↑ 《明報》；2007年6月4號D5版。作者係白路明
- ↑ 〈蘋果日報，2007年6月7號報導：《網上流傳：保皇主義者叫維基刪〈福佳〉》〉。原著喺2007年6月9號歸檔。喺2007年6月9號搵到。
- ↑ The Hong Kong Handover Hangover Daisann McLane Washington D.C.: Slate, 2007年6月29號
- ↑ 原作者響佢自己個博客度留低嘅註釋