福特蘭地

福特蘭地嘅主要倉庫

廢墟 2005年

廢墟 2005年

福特蘭地（葡文：Fordlândia） 係喺巴西帕拉州阿韋羅市嘅一笪地方。面積 14.268 平方公里，地處 Tapajós 河嘅東岸，Santarém 市以南約三佰公里。

20世紀20年代，橡膠嘅供應由英國壟斷，主要用於生產車呔同零件。美國汽車大亨亨利福特，為咗確保橡膠嘅供應，1928年，亞馬遜熱帶雨林之中搵咗呢度，諗住有一萬人住，同巴西政府傾掂數，以九個 ％ 嘅利潤，嚟換聖塔倫市，RioTapajós 河邊一萬平方公里土地嘅特許經營權。

呢項目唔係好掂，物流差，冇路，得條河，工人又黃熱病又瘧疾。1930年，當地工人因為住得差 ，又食唔慣美國嘢食，喺飯堂暴動／起義，稱之為 Quebra-Panelas（「打爛砂煲」）。巴西政府唔肯幫手，之後問題更多，1934年福特公司放棄福特蘭地，將生產同工人搬去 Santarém 以南四十公里嘅 Belterra 鎮，嗰度橡膠樹生得好啲。1945年，合成橡膠面世，各地對天然橡膠嘅需求大減。福特公司放棄咗呢兩個鎮。1945年，福特個孫亨利福特二世將包括兩個鎮嘅地方賣返畀巴西政府，損失超過二千萬美金（相當於2018年嘅 2.78億美金）。

呢笪地方基本上係鬼城，只得九十人住。直到21世紀初人口增加，截至2017年，大概住咗三千人。