秩父宮雍仁親王

雍仁響1940年

秩父宮雍仁親王（日文：秩父宮雍仁親王／ちちぶのみや やすひとしんのう ^{Chichibu-no-miya Yasuhito Shinnō} 、1902年6月25號—1953年1月4號）係大正天皇二仔、昭和天皇細佬，乳名淳宮（日文：淳宮／あつのみや ^{Atsu no miya}），曾經係日本陸軍少將、日本國會議員，宮號係秩父宮。

經歷

由左手開始數起係皇太子裕仁親王、三笠宮崇仁親王、高松宮宣仁親王同埋雍仁佢自己

佢同大佬裕仁、二細佬宣仁年紀差唔多大，但係當三個比起上嚟，雍仁佢係最好動嗰個，例如三個人爭玩具嘅時候，雍仁多數都係最先搶到玩具嗰個。聽講，因為係咁，爺爺明治天皇經常送玩具畀佢玩，但兩爺孫好少見面。

響1909年，佢入讀學習院初等科，之後升讀學習院中等科，試過轉讀陸軍中央幼年學校。響1920年，入讀陸軍士官學校，兩年之後畢業，升上做陸軍少尉，同年設立秩父宮。響1928年，正式同松平恆雄大女節子結婚，而節子改名叫勢津子。當時啲人叫呢場婚姻做「本世紀嘅大戀愛」。勢津子曾經大過一次肚，當時佢哋好開心，但之後勢津子流產，佢哋就好傷心，之後勢津子都再冇試過大肚。

雍仁響1948年

響1931年，佢做上陸上自衛隊第1師團步兵第三連隊中隊長，響1935年做弘前市步兵第31連隊第3大隊長，而老婆勢津子都同佢一齊去弘前。

雍仁親王像

皇道派軍官一直都好想立雍仁佢做天皇，因為佢比起大佬裕仁更加受到國民鍾意（因為佢好活潑，玩滑雪同欖球都好叻，同埋嗰時侄仔明仁都未出世，再加上佢哋覺得雍仁叻過比裕仁），就連駐日盟軍總司令部阿頭麥克阿瑟都曾經諗住命令裕仁讓位畀雍仁。響1933年，明仁出世，雍仁嘅地位開始下滑。響1936年，發生咗二二六事件，之後有好多支持雍仁佢繼位嘅軍宮畀裕仁徹底清除，佢響軍隊入面嘅影響力徹底下降。

響1937年，佢到歐洲巡迴訪問，試過出席佐治六世嘅登基儀式。佢行程嘅最後一站係德國，重同希特拉響紐倫堡會談。當希特拉提到史太林嘅時候，雍仁直接咁話「我好憎佢」。之後佢一直都唔支持日本結盟，同支持日本結盟嘅裕仁相反。

響1938年，佢以陸軍少將嘅身份出任華南派遣軍參謀，參加中日戰爭。

雍仁同勢津子

1940年被診斷有肺癆，1941年開始一直喺日本養病，1953年響神奈川縣病逝，終年50歲。